אִיּוֹבי״ט

איוב מוכיח את רעיו האכזריים

א׳
ויען איוב ויאמר׃
ב׳
עד אנה תוגיון נפשי ותדכאונני במלים׃
ג׳
זה עשר פעמים תכלימוני לא תבשו תהכרו לי׃
ד׳
ואף אמנם שגיתי אתי תלין משוגתי׃
ה׳
אם אמנם עלי תגדילו ותוכיחו עלי חרפתי׃
ו׳
דעו אפו כי אלוה עותני ומצודו עלי הקיף׃

אלוהים הוא לי לצר

ז׳
הן אצעק חמס ולא אענה אשוע ואין משפט׃
ח׳
ארחי גדר ולא אעבור ועל נתיבותי חשך ישים׃
ט׳
כבודי מעלי הפשיט ויסר עטרת ראשי׃
י׳
יתצני סביב ואלך ויסע כעץ תקותי׃
י״א
ויחר עלי אפו ויחשבני לו כצריו׃
י״ב
יחד יבאו גדודיו ויסלו עלי דרכם ויחנו סביב לאהלי׃

בידוד מוחלט וריקבון הגוף

י״ג
אחי מעלי הרחיק וידעי אך זרו ממני׃
י״ד
חדלו קרובי ומידעי שכחוני׃
ט״ו
גרי ביתי ואמהתי לזר תחשבני נכרי הייתי בעיניהם׃
ט״ז
לעבדי קראתי ולא יענה במו פי אתחנן לו׃
י״ז
רוחי זרה לאשתי וחנתי לבני בטני׃
י״ח
גם עוילים מאסו בי אקומה וידברו בי׃
י״ט
תעבוני כל מתי סודי וזה אהבתי נהפכו בי׃
כ׳
בעורי ובבשרי דבקה עצמי ואתמלטה בעור שני׃
כ״א
חנני חנני אתם רעי כי יד אלוה נגעה בי׃
כ״ב
למה תרדפני כמו אל ומבשרי לא תשבעו׃

גואלי חי

כ״ג
מי יתן אפו ויכתבון מלי מי יתן בספר ויחקו׃
כ״ד
בעט ברזל ועפרת לעד בצור יחצבון׃
כ״ה
ואני ידעתי גאלי חי ואחרון על עפר יקום׃
כ״ו
ואחר עורי נקפו זאת ומבשרי אחזה אלוה׃
כ״ז
אשר אני אחזה לי ועיני ראו ולא זר כלו כליתי בחקי׃

אזהרת משפט

כ״ח
כי תאמרו מה נרדף לו ושרש דבר נמצא בי׃
כ״ט
גורו לכם מפני חרב כי חמה עונות חרב למען תדעון שדין׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options