מַעֲשֵׂי הַשְּׁלִיחִיםי״א

פטרוס מגן על שירותו בקרב הגויים

א׳
וישמעו השליחים והאחים אשר ביהודה כי קבלו גם הגוים את דבר האלהים׃
ב׳
ויהי כאשר עלה פטרוס ירושלים ויריבו עמו בני המילה לאמר׃
ג׳
אל אנשים אשר להם ערלה באת ותאכל אתם לחם׃
ד׳
ויחל פטרוס ויספר להם את כל אשר קרהו לאמר׃
ה׳
מתפלל הייתי בעיר יפו וארדם וארא מראה והנה כלי כדמות מטפחת בד גדולה יורד מן השמים ותורד בארבע כנפותיה ותבא עדי׃
ו׳
והסתכלתי בה ואבין וארא את בהמת הארץ ואת החיה ורמש האדמה ועוף השמים׃
ז׳
ואשמע גם קול האמר אלי קום פטרוס זבח ואכל׃
ח׳
ואמר חלילה לי אדני כי כל פגול וטמא לא בא בפי מעולם׃
ט׳
ויענני הקול שנית מן השמים ויאמר את אשר טהר האלהים אתה אל תטמאנו׃
י׳
וכן היה שלש פעמים והכל שב והעלה השמימה׃
י״א
והנה כרגע שלשה אנשים עמדים על פתח הבית אשר אנכי שם והמה שלוחים אלי מקסרין׃
י״ב
ויאמר אלי הרוח ללכת אתם ולבלתי התמהמה וילכו אתי גם ששת האחים האלה ונבוא אל בית האיש׃
י״ג
ויגד לנו את אשר ראה המלאך נצב בביתו ואמר אליו שלח אל יפו אנשים וקרא אליך את שמעון המכנה פטרוס׃
י״ד
והוא ידבר אליך דברים אשר תושע בהם אתה וכל ביתך׃
ט״ו
וכאשר החלותי לדבר צלחה עליהם רוח הקדש כאשר צלחה עלינו בתחלה׃
ט״ז
ואזכר את דבר האדון אשר אמר יוחנן הטביל במים ואתם תטבלו ברוח הקדש׃
י״ז
ועתה אם מתנה אחת נתן האלהים להם ולנו המאמינים באדון ישוע המשיח מי אנכי כי אעצר לאלהים׃
י״ח
ויהי כשמעם זאת ויחרישו ויהללו את האלהים ויאמרו אכן גם לגוים נתן האלהים התשובה לחיים׃

הבשורה מתפשטת לאנטיוכיה

י״ט
והנפוצים מפני הצרה אשר היתה על אודת אסטפנוס הלכו ובאו עד פינוקיא וקפרוס ואנטיוכיא ולא דברו את הדבר כי אם אל היהודים לבדם׃
כ׳
ויהי בתוכם אנשי קפרוס וקוריני אשר באו אל אנטיוכיא וידברו גם אל היונים ויבשרו אתם את האדון ישוע׃
כ״א
ותהי עמהם יד יהוה ומספר רב האמינו וישובו אל האדון׃
כ״ב
וישמע הדבר באזני הקהלה אשר בירושלים וישלחו את בר נבא אל אנטיוכיא׃
כ״ג
ויבא שמה וישמח כראתו את חסד האלהים ויזהר את כלם לדבקה באדון בלב נכון׃
כ״ד
כי איש טוב היה ומלא רוח הקדש ואמונה ויאספו לאדון עם רב׃
כ״ה
וילך בר נבא משם אל טרסוס לבקש את שאול וימצא אתו ויביאהו אל אנטיוכיא׃
כ״ו
ויהיו ישבים יחד בקהלה שנה תמימה ומלמדים עם רב אז הוחל באנטיוכיא לקרא את התלמידים בשם משיחיים׃

סיוע בעת רעב נשלח ליהודה

כ״ז
ויהי בימים ההם ויבאו נביאים מירושלים אל אנטיוכיא׃
כ״ח
ויקם אחד מהם ושמו אגבוס ויגד על פי הרוח כי רעב גדול יבוא על כל ישבי תבל ויהי כן בימי קלודיוס׃
כ״ט
ויועצו התלמידים לשלח איש איש מאשר תשיג ידו לעזרת האחים הישבים ביהודה׃
ל׳
וכן גם עשו וישלחו אל הזקנים על ידי בר נבא ושאול׃
Use ← → arrow keys to navigate
Settings

Reading Style

Typeface

Font Size 19px

Options