פסוקים על Solomon: His prayer for wisdom, and his vision

16 פסוקים · 46 היבטים

פסוקים על His prayer for wisdom, and his vision

  1. 1 מְלָכִים ג׳:ה׳

    בגבעון נראה יהוה אל שלמה בחלום הלילה ויאמר אלהים שאל מה אתן לך׃

  2. 1 מְלָכִים ג׳:ו׳

    ויאמר שלמה אתה עשית עם עבדך דוד אבי חסד גדול כאשר הלך לפניך באמת ובצדקה ובישרת לבב עמך ותשמר לו את החסד הגדול הזה ותתן לו בן ישב על כסאו כיום הזה׃

  3. 1 מְלָכִים ג׳:ז׳

    ועתה יהוה אלהי אתה המלכת את עבדך תחת דוד אבי ואנכי נער קטן לא אדע צאת ובא׃

  4. 1 מְלָכִים ג׳:ח׳

    ועבדך בתוך עמך אשר בחרת עם רב אשר לא ימנה ולא יספר מרב׃

  5. 1 מְלָכִים ג׳:ט׳

    ונתת לעבדך לב שמע לשפט את עמך להבין בין טוב לרע כי מי יוכל לשפט את עמך הכבד הזה׃

  6. 1 מְלָכִים ג׳:י׳

    וייטב הדבר בעיני אדני כי שאל שלמה את הדבר הזה׃

  7. 1 מְלָכִים ג׳:י״א

    ויאמר אלהים אליו יען אשר שאלת את הדבר הזה ולא שאלת לך ימים רבים ולא שאלת לך עשר ולא שאלת נפש איביך ושאלת לך הבין לשמע משפט׃

  8. 1 מְלָכִים ג׳:י״ב

    הנה עשיתי כדבריך הנה נתתי לך לב חכם ונבון אשר כמוך לא היה לפניך ואחריך לא יקום כמוך׃

  9. 1 מְלָכִים ג׳:י״ג

    וגם אשר לא שאלת נתתי לך גם עשר גם כבוד אשר לא היה כמוך איש במלכים כל ימיך׃

  10. 1 מְלָכִים ג׳:י״ד

    ואם תלך בדרכי לשמר חקי ומצותי כאשר הלך דויד אביך והארכתי את ימיך׃

  11. 2 דִּבְרֵי הַיָּמִים א׳:ז׳

    בלילה ההוא נראה אלהים לשלמה ויאמר לו שאל מה אתן לך׃

  12. 2 דִּבְרֵי הַיָּמִים א׳:ח׳

    ויאמר שלמה לאלהים אתה עשית עם דויד אבי חסד גדול והמלכתני תחתיו׃

  13. 2 דִּבְרֵי הַיָּמִים א׳:ט׳

    עתה יהוה אלהים יאמן דברך עם דויד אבי כי אתה המלכתני על עם רב כעפר הארץ׃

  14. 2 דִּבְרֵי הַיָּמִים א׳:י׳

    עתה חכמה ומדע תן לי ואצאה לפני העם הזה ואבואה כי מי ישפט את עמך הזה הגדול׃

  15. 2 דִּבְרֵי הַיָּמִים א׳:י״א

    ויאמר אלהים לשלמה יען אשר היתה זאת עם לבבך ולא שאלת עשר נכסים וכבוד ואת נפש שנאיך וגם ימים רבים לא שאלת ותשאל לך חכמה ומדע אשר תשפוט את עמי אשר המלכתיך עליו׃

  16. 2 דִּבְרֵי הַיָּמִים א׳:י״ב

    החכמה והמדע נתון לך ועשר ונכסים וכבוד אתן לך אשר לא היה כן למלכים אשר לפניך ואחריך לא יהיה כן׃