פסוקים על Psalms

יחל ישראל אל יהוה מעתה ועד עולם׃

¶ שיר המעלות לדוד הנה מה טוב ומה נעים שבת אחים גם יחד׃

כשמן הטוב על הראש ירד על הזקן זקן אהרן שירד על פי מדותיו׃

כטל חרמון שירד על הררי ציון כי שם צוה יהוה את הברכה חיים עד העולם׃

¶ שיר המעלות הנה ברכו את יהוה כל עבדי יהוה העמדים בבית יהוה בלילות׃

שאו ידכם קדש וברכו את יהוה׃

יברכך יהוה מציון עשה שמים וארץ׃

¶ על נהרות בבל שם ישבנו גם בכינו בזכרנו את ציון׃

על ערבים בתוכה תלינו כנרותינו׃

כי שם שאלונו שובינו דברי שיר ותוללינו שמחה שירו לנו משיר ציון׃

איך נשיר את שיר יהוה על אדמת נכר׃

אם אשכחך ירושלם תשכח ימיני׃

תדבק לשוני לחכי אם לא אזכרכי אם לא אעלה את ירושלם על ראש שמחתי׃

זכר יהוה לבני אדום את יום ירושלם האמרים ערו ערו עד היסוד בה׃

בת בבל השדודה אשרי שישלם לך את גמולך שגמלת לנו׃

אשרי שיאחז ונפץ את עלליך אל הסלע׃

¶ לדוד אודך בכל לבי נגד אלהים אזמרך׃

אשתחוה אל היכל קדשך ואודה את שמך על חסדך ועל אמתך כי הגדלת על כל שמך אמרתך׃

ביום קראתי ותענני תרהבני בנפשי עז׃

יודוך יהוה כל מלכי ארץ כי שמעו אמרי פיך׃

וישירו בדרכי יהוה כי גדול כבוד יהוה׃

כי רם יהוה ושפל יראה וגבה ממרחק יידע׃

אם אלך בקרב צרה תחיני על אף איבי תשלח ידך ותושיעני ימינך׃

יהוה יגמר בעדי יהוה חסדך לעולם מעשי ידיך אל תרף׃

¶ למנצח מזמור לדוד חלצני יהוה מאדם רע מאיש חמסים תנצרני׃