פסוקים על Psalms: For God's mercies to individuals

¶ מזמור שיר חנכת הבית לדוד ארוממך יהוה כי דליתני ולא שמחת איבי לי׃

יהוה אלהי שועתי אליך ותרפאני׃

יהוה העלית מן שאול נפשי חייתני מיורדי בור׃

זמרו ליהוה חסידיו והודו לזכר קדשו׃

כי רגע באפו חיים ברצונו בערב ילין בכי ולבקר רנה׃

ואני אמרתי בשלוי בל אמוט לעולם׃

יהוה ברצונך העמדתה להררי עז הסתרת פניך הייתי נבהל׃

אליך יהוה אקרא ואל אדני אתחנן׃

מה בצע בדמי ברדתי אל שחת היודך עפר היגיד אמתך׃

שמע יהוה וחנני יהוה היה עזר לי׃

הפכת מספדי למחול לי פתחת שקי ותאזרני שמחה׃

למען יזמרך כבוד ולא ידם יהוה אלהי לעולם אודך׃

¶ למנצח אל תשחת מזמור לאסף שיר הודינו לך אלהים הודינו וקרוב שמך ספרו נפלאותיך׃

כי אקח מועד אני מישרים אשפט׃

נמגים ארץ וכל ישביה אנכי תכנתי עמודיה סלה׃

אמרתי להוללים אל תהלו ולרשעים אל תרימו קרן׃

אל תרימו למרום קרנכם תדברו בצואר עתק׃

כי לא ממוצא וממערב ולא ממדבר הרים׃

כי אלהים שפט זה ישפיל וזה ירים׃

כי כוס ביד יהוה ויין חמר מלא מסך ויגר מזה אך שמריה ימצו ישתו כל רשעי ארץ׃

ואני אגיד לעלם אזמרה לאלהי יעקב׃

וכל קרני רשעים אגדע תרוממנה קרנות צדיק׃

¶ שיר מזמור לדוד נכון לבי אלהים אשירה ואזמרה אף כבודי׃

עורה הנבל וכנור אעירה שחר׃

אודך בעמים יהוה ואזמרך בל אמים׃