פסוקים על Ingratitude to God: Illustrated

22 פסוקים · 14 היבטים

פסוקים על Illustrated

יְשַׁעְיָהוּ ה׳:א׳
¶ אשירה נא לידידי שירת דודי לכרמו כרם היה לידידי בקרן בן שמן׃
יְשַׁעְיָהוּ ה׳:ב׳
ויעזקהו ויסקלהו ויטעהו שרק ויבן מגדל בתוכו וגם יקב חצב בו ויקו לעשות ענבים ויעש באשים׃
יְשַׁעְיָהוּ ה׳:ג׳
ועתה יושב ירושלם ואיש יהודה שפטו נא ביני ובין כרמי׃
יְשַׁעְיָהוּ ה׳:ד׳
מה לעשות עוד לכרמי ולא עשיתי בו מדוע קויתי לעשות ענבים ויעש באשים׃
יְשַׁעְיָהוּ ה׳:ה׳
ועתה אודיעה נא אתכם את אשר אני עשה לכרמי הסר משוכתו והיה לבער פרץ גדרו והיה למרמס׃
יְשַׁעְיָהוּ ה׳:ו׳
ואשיתהו בתה לא יזמר ולא יעדר ועלה שמיר ושית ועל העבים אצוה מהמטיר עליו מטר׃
יְשַׁעְיָהוּ ה׳:ז׳
כי כרם יהוה צבאות בית ישראל ואיש יהודה נטע שעשועיו ויקו למשפט והנה משפח לצדקה והנה צעקה׃
יְחֶזְקֵאל ט״ז:א׳
¶ ויהי דבר יהוה אלי לאמר׃
יְחֶזְקֵאל ט״ז:ב׳
בן אדם הודע את ירושלם את תועבתיה׃
יְחֶזְקֵאל ט״ז:ג׳
ואמרת כה אמר אדני יהוה לירושלם מכרתיך ומלדתיך מארץ הכנעני אביך האמרי ואמך חתית׃
יְחֶזְקֵאל ט״ז:ד׳
ומולדותיך ביום הולדת אתך לא כרת שרך ובמים לא רחצת למשעי והמלח לא המלחת והחתל לא חתלת׃
יְחֶזְקֵאל ט״ז:ה׳
לא חסה עליך עין לעשות לך אחת מאלה לחמלה עליך ותשלכי אל פני השדה בגעל נפשך ביום הלדת אתך׃
יְחֶזְקֵאל ט״ז:ו׳
ואעבר עליך ואראך מתבוססת בדמיך ואמר לך בדמיך חיי ואמר לך בדמיך חיי׃
יְחֶזְקֵאל ט״ז:ז׳
רבבה כצמח השדה נתתיך ותרבי ותגדלי ותבאי בעדי עדיים שדים נכנו ושערך צמח ואת ערם ועריה׃
יְחֶזְקֵאל ט״ז:ח׳
ואעבר עליך ואראך והנה עתך עת דדים ואפרש כנפי עליך ואכסה ערותך ואשבע לך ואבוא בברית אתך נאם אדני יהוה ותהיי לי׃
יְחֶזְקֵאל ט״ז:ט׳
וארחצך במים ואשטף דמיך מעליך ואסכך בשמן׃
יְחֶזְקֵאל ט״ז:י׳
ואלבישך רקמה ואנעלך תחש ואחבשך בשש ואכסך משי׃
יְחֶזְקֵאל ט״ז:י״א
ואעדך עדי ואתנה צמידים על ידיך ורביד על גרונך׃
יְחֶזְקֵאל ט״ז:י״ב
ואתן נזם על אפך ועגילים על אזניך ועטרת תפארת בראשך׃
יְחֶזְקֵאל ט״ז:י״ג
ותעדי זהב וכסף ומלבושך ששי ומשי ורקמה סלת ודבש ושמן אכלתי ותיפי במאד מאד ותצלחי למלוכה׃
יְחֶזְקֵאל ט״ז:י״ד
ויצא לך שם בגוים ביפיך כי כליל הוא בהדרי אשר שמתי עליך נאם אדני יהוה׃
יְחֶזְקֵאל ט״ז:ט״ו
ותבטחי ביפיך ותזני על שמך ותשפכי את תזנותיך על כל עובר לו יהי׃