יְשַׁעְיָהוּמ״א

אלוהים קורא לאומות למשפט

א׳
החרישו אלי איים ולאמים יחליפו כח יגשו אז ידברו יחדו למשפט נקרבה׃
ב׳
מי העיר ממזרח צדק יקראהו לרגלו יתן לפניו גוים ומלכים ירד יתן כעפר חרבו כקש נדף קשתו׃
ג׳
ירדפם יעבור שלום ארח ברגליו לא יבוא׃
ד׳
מי פעל ועשה קרא הדרות מראש אני יהוה ראשון ואת אחרנים אני הוא׃

האומות יראות ובוטחות באלילים

ה׳
ראו איים וייראו קצות הארץ יחרדו קרבו ויאתיון׃
ו׳
איש את רעהו יעזרו ולאחיו יאמר חזק׃
ז׳
ויחזק חרש את צרף מחליק פטיש את הולם פעם אמר לדבק טוב הוא ויחזקהו במסמרים לא ימוט׃

נחמה והבטחה לישראל

ח׳
ואתה ישראל עבדי יעקב אשר בחרתיך זרע אברהם אהבי׃
ט׳
אשר החזקתיך מקצות הארץ ומאציליה קראתיך ואמר לך עבדי אתה בחרתיך ולא מאסתיך׃
י׳
אל תירא כי עמך אני אל תשתע כי אני אלהיך אמצתיך אף עזרתיך אף תמכתיך בימין צדקי׃
י״א
הן יבשו ויכלמו כל הנחרים בך יהיו כאין ויאבדו אנשי ריבך׃
י״ב
תבקשם ולא תמצאם אנשי מצתך יהיו כאין וכאפס אנשי מלחמתך׃
י״ג
כי אני יהוה אלהיך מחזיק ימינך האמר לך אל תירא אני עזרתיך׃
י״ד
אל תיראי תולעת יעקב מתי ישראל אני עזרתיך נאם יהוה וגאלך קדוש ישראל׃
ט״ו
הנה שמתיך למורג חרוץ חדש בעל פיפיות תדוש הרים ותדק וגבעות כמץ תשים׃
ט״ז
תזרם ורוח תשאם וסערה תפיץ אותם ואתה תגיל ביהוה בקדוש ישראל תתהלל׃

אספקה פלאית ושיקום

י״ז
העניים והאביונים מבקשים מים ואין לשונם בצמא נשתה אני יהוה אענם אלהי ישראל לא אעזבם׃
י״ח
אפתח על שפיים נהרות ובתוך בקעות מעינות אשים מדבר לאגם מים וארץ ציה למוצאי מים׃
י״ט
אתן במדבר ארז שטה והדס ועץ שמן אשים בערבה ברוש תדהר ותאשור יחדו׃
כ׳
למען יראו וידעו וישימו וישכילו יחדו כי יד יהוה עשתה זאת וקדוש ישראל בראה׃

אלוהים קורא שוב לאלילים למשפט

כ״א
קרבו ריבכם יאמר יהוה הגישו עצמותיכם יאמר מלך יעקב׃
כ״ב
יגישו ויגידו לנו את אשר תקרינה הראשנות מה הנה הגידו ונשימה לבנו ונדעה אחריתן או הבאות השמיענו׃
כ״ג
הגידו האתיות לאחור ונדעה כי אלהים אתם אף תיטיבו ותרעו ונשתעה ונרא יחדו׃
כ״ד
הן אתם מאין ופעלכם מאפע תועבה יבחר בכם׃
כ״ה
העירותי מצפון ויאת ממזרח שמש יקרא בשמי ויבא סגנים כמו חמר וכמו יוצר ירמס טיט׃
כ״ו
מי הגיד מראש ונדעה ומלפנים ונאמר צדיק אף אין מגיד אף אין משמיע אף אין שמע אמריכם׃
כ״ז
ראשון לציון הנה הנם ולירושלם מבשר אתן׃
כ״ח
וארא ואין איש ומאלה ואין יועץ ואשאלם וישיבו דבר׃
כ״ט
הן כלם און אפס מעשיהם רוח ותהו נסכיהם׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options