God

Mcheni Bwana enyi watakatifu wake, kwa maana wale wamchao hawapungukiwi na chochote.

Wana simba wenye nguvu hutindikiwa na kuona njaa, bali wale wamtafutao Bwana hawatakosa kitu chochote kilicho chema.

Njooni, watoto wangu, mnisikilize, nitawafundisha kumcha Bwana.

Macho ya Bwana huwaelekea wenye haki, na masikio yake yako makini kusikiliza kilio chao.

Uso wa Bwana uko kinyume na watendao maovu, ili kufuta kumbukumbu lao duniani.

Wenye haki hulia, naye Bwana huwasikia, huwaokoa katika taabu zao zote.

Bwana yu karibu na waliovunjika moyo, na huwaokoa waliopondeka roho.

Mwenye haki ana mateso mengi, lakini Bwana humwokoa nayo yote,

Bwana huwakomboa watumishi wake, yeyote anayemkimbilia yeye hatahukumiwa kamwe.

Zaburi ya Daudi. Ee Bwana, pingana na wale wanaopingana nami, upigane na hao wanaopigana nami.

Wawe kama makapi yapeperushwayo na upepo, malaika wa Bwana akiwafukuza.

Njia yao na iwe giza na ya utelezi, malaika wa Bwana akiwafuatilia.

Ndipo nafsi yangu itashangilia katika Bwana na kuufurahia wokovu wake.

Nitapaza sauti yangu nikisema, “Ni nani aliye kama wewe, Ee Bwana? Wewe huwaokoa maskini kutokana na wale walio na nguvu kuliko wao, maskini na mhitaji kutokana na wanaowanyangʼanya!”

Ee Bwana, utatazama mpaka lini? Niokoe maisha yangu na maangamizi yao, uhai wangu wa thamani kutokana na simba hawa.

Nami nitakushukuru mbele ya kusanyiko kubwa, nitakusifu katikati ya watu wengi.

Ee Bwana, umeona hili, usiwe kimya. Usiwe mbali nami, Ee Bwana.

Amka, inuka unitetee! Unipiganie Mungu wangu na Bwana wangu.

Nihukumu kwa haki yako, Ee Bwana Mungu wangu, sawasawa na haki yako; usiwaache wakusimange.

Wale wanaofurahia hukumu yangu ya haki wapige kelele za shangwe na furaha; hebu waseme siku zote, “Bwana atukuzwe, ambaye amefurahia mafanikio ya mtumishi wake.”

Ulimi wangu utanena haki yako na sifa zako mchana kutwa.

Kwa mwimbishaji. Zaburi ya Daudi mtumishi wa Bwana. Kuna neno moyoni mwangu kuhusu hali ya dhambi ya mwovu. Hakuna hofu ya Mungu mbele ya macho yake.

Upendo wako, Ee Bwana, unafika hadi mbinguni, uaminifu wako hadi kwenye anga.

Haki yako ni kama milima mikubwa, hukumu zako ni kama kilindi kikuu. Ee Bwana, wewe huwahifadhi mwanadamu na mnyama.

Upendo wako usiokoma ni wa thamani mno! Watu wakuu na wadogo hujificha uvulini wa mbawa zako.