TRV
מתיו כ״ו:א׳-ט״ז
א׳
¶ ויהי ככלות ישוע לדבר את כל הדברים האלה ויאמר אל תלמידיו׃
ב׳
אתם ידעתם כי אחרי יומים יהיה הפסח ובן האדם ימסר להצלב׃
ג׳
ויקהלו הכהנים הגדולים והסופרים וזקני העם אל חצר הכהן הגדול הנקרא קיפא׃
ד׳
ויועצו יחדו לתפש את ישוע בערמה ולהמיתו׃
ה׳
ויאמרו אך לא בחג פן תהיה מהומה בעם׃
ו׳
ויהי בהיות ישוע בית היני בבית שמעון המצרע׃
ז׳
ותקרב אליו אשה ובידה פך שמן יקר מאד ותצק על ראשו בהסבו על השלחן׃
ח׳
ויראו התלמידים ויתרעמו לאמר על מה האבוד הזה׃
ט׳
כי השמן הזה היה ראוי להמכר במחיר רב ולתתו לעניים׃
י׳
וידע ישוע ויאמר אליהם למה תוגו את האשה הלא מעשה טוב עשתה עמדי׃
י״א
כי עניים תמיד עמכם ואנכי אינני אתכם תמיד׃
י״ב
כי אשר שפכה את השמן הזה על גופי לחנט אותי עשתה זאת׃
י״ג
אמן אמר אני לכם באשר תקרא הבשורה הזאת בכל העולם גם את אשר היא עשתה יספר לזכרון לה׃
י״ד
וילך אחד משנים העשר הנקרא יהודה איש קריות אל ראשי הכהנים׃
ט״ו
ויאמר מה תתנו לי ואמסרנו בידכם וישקלו לו שלשים כסף׃
ט״ז
ומן העת ההיא בקש תאנה למסר אותו׃
Settings