הַבְּשׂוֹרָה הַקְּדוֹשָׁה עַל־פִּי מַתַּי כ״א:א׳-י״ח
א׳
¶ ויהי כאשר קרבו לירושלים ובאו אל בית פגי בהר הזיתים וישלח ישוע שנים מן התלמידים׃
ב׳
ויאמר אליהם לכו אל הכפר אשר ממולכם שם תמצאו אתון אסורה ועיר עמה התירו אתם והביאו אלי׃
ג׳
וכי יאמר איש אליכם דבר ואמרתם האדון צריך להם וברגע ישלחם׃
ד׳
וכל זאת היתה למלאת הנאמר ביד הנביא לאמר׃
ה׳
אמרו לבת ציון הנה מלכך יבוא לך עני ורכב על חמור ועל עיר בן אתנות׃
ו׳
וילכו התלמידים ויעשו כאשר צוה אתם ישוע׃
ז׳
ויביאו את האתון ואת העיר וישימו עליהם את בגדיהם וירכיבהו עליהם׃
ח׳
ורב ההמון פרשו את בגדיהם על הדרך ואחרים כרתו ענפי עצים וישטחום על הדרך׃
ט׳
והמון העם ההלכים לפניו ואחריו קראו לאמר הושע נא לבן דוד ברוך הבא בשם יהוה הושע נא במרומים׃
י׳
ויהי בבאו ירושלים ותהם כל העיר לאמר מי הוא זה׃
י״א
ויאמרו המני העם זה הוא הנביא ישוע מנצרת אשר בגליל׃
י״ב
ויבא ישוע אל מקדש האלהים ויגרש משם את כל המוכרים והקונים במקדש ויהפך את שלחנות השלחנים ואת מושבות מכרי היונים׃
י״ג
ויאמר אליהם הן כתוב כי ביתי בית תפלה יקרא ואתם שמתם אתו למערת פריצים׃
י״ד
ויגשו אליו עורים ופסחים במקדש וירפאם׃
ט״ו
ויהי כראות הכהנים הגדולים והסופרים את הנפלאות אשר עשה ואת הילדים הצעקים במקדש ואמרים הושע נא לבן דוד ויחר להם׃
ט״ז
ויאמרו אליו השמע אתה את אשר אלה אמרים ויאמר ישוע אליהם כן הכי קרא לא קראתם מפי עוללים ויונקים יסדת עז׃
י״ז
ויעזבם ויצא מחוץ לעיר אל בית היני וילן שם׃
י״ח
ובבקר שב אל העיר והוא רעב׃
Settings