הַבְּשׂוֹרָה הַקְּדוֹשָׁה עַל־פִּי מַתַּי י״ב:ו׳-ל׳
ו׳
אבל אני אמר לכם כי יש פה גדול מן המקדש׃
ז׳
ולו ידעתם מה הוא חסד חפצתי ולא זבח לא הרשעתם את הנקים׃
ח׳
כי בן האדם הוא גם אדון השבת׃
ט׳
ויעבר משם אל בית כנסתם׃
י׳
והנה שם איש אשר ידו יבשה וישאלוהו לאמר המתר לרפא בשבת למען ימצאו עליו שטנה׃
י״א
ויאמר אליהם מי האיש בכם אשר לו כבש אחד ונפל בבור בשבת ולא יחזיק בו ויעלנו׃
י״ב
ומה יקר אדם מן הכבש לכן מתר להיטיב בשבת׃
י״ג
ויאמר אל האיש פשט את ידך ויפשט אתה ותרפא ותשב כידו האחרת׃
י״ד
ויצא הפרושים ויתיעצו עליו לאבדו׃
ט״ו
וידע ישוע ויסר משם וילך אחריו המון עם רב וירפאם כלם׃
ט״ז
ויצו אתם בגערה שלא יגלהו׃
י״ז
למלאת את אשר דבר ישעיהו הנביא לאמר׃
י״ח
הן עבדי בחרתי בו ידידי רצתה נפשי נתתי רוחי עליו ומשפט לגוים יוציא׃
י״ט
לא יצעק ולא ישא ולא ישמע בחוץ קולו׃
כ׳
קנה רצוץ לא ישבור ופשתה כהה לא יכבנה עד יוציא לנצח משפט׃
כ״א
ולשמו גוים ייחלו׃
כ״ב
אז הובא אליו איש עור ואלם אשר אחזו שד וירפאהו וידבר האלם וגם ראה׃
כ״ג
וישתוממו כל המון העם ויאמרו הכי זה הוא בן דוד׃
כ״ד
והפרושים כשמעם זאת אמרו זה איננו מגרש את השדים כי אם על ידי בעל זבוב שר השדים׃
כ״ה
וישוע ידע את מחשבותם ויאמר אליהם כל ממלכה הנחלקה על עצמה תחרב וכל עיר ובית הנחלקים על עצמם לא יכונו׃
כ״ו
והשטן אם יגרש את השטן נחלק על עצמו ואיככה תכון ממלכתו׃
כ״ז
ואם אני מגרש את השדים בבעל זבוב בניכם במי הם מגרשים אתם על כן המה יהיו שפטיכם׃
כ״ח
אך אם ברוח אלהים אני מגרש את השדים הנה הגיעה אליכם מלכות האלהים׃
כ״ט
או איך יוכל איש לבוא לבית הגבור ולגזל את כליו אם לא יאסר בראשונה את הגבור ואחר ישסה את ביתו׃
ל׳
כל אשר איננו אתי הוא לנגדי ואשר איננו מכנס אתי הוא מפזר׃
Settings