TRV
הבְּשׂוֹרָה הַקְּדוֹשָׁה עַל־פִּי לוּקָס כ״ג:ל״ב-מ״ט
ל״ב
וגם שנים אחרים אנשי בליעל מוצאים אתו למות׃
ל״ג
ויהי כאשר באו אל המקום הנקרא גלגלתא ויצלבו אתו שם ואת אנשי הבליעל זה לימינו וזה לשמאלו׃
ל״ד
ויאמר ישוע אבי סלח להם כי לא ידעו מה הם עשים ויחלקו בגדיו להם ויפילו גורל׃
ל״ה
והעם עמד שם וראה וילעגו לו השרים לאמר את אחרים הושיע יושע נא את נפשו אם הוא המשיח בחיר האלהים׃
ל״ו
ויהתלו בו אנשי הצבא ויגשו ויביאו לו חמץ׃
ל״ז
ויאמרו אם אתה הוא מלך היהודים הושע את נפשך׃
ל״ח
וגם מכתב היה ממעל לו בכתב יוני ורומי ועברי זה הוא מלך היהודים׃
ל״ט
ואחד מאנשי הבליעל התלוים גדפו לאמר הלא אתה המשיח הושע את עצמך ואתנו׃
מ׳
ויען האחר ויגער בו לאמר האינך ירא את האלהים בהיותך בעצם הענש הזה׃
מ״א
והן אנחנו בו כמשפט כי לקחנו כפי מעשינו אבל זה לא עשה מאומה רע׃
מ״ב
ויאמר אל ישוע זכרני נא אדני בבאך במלכותך׃
מ״ג
ויאמר ישוע אליו אמן אמר אני לך כי היום תהיה עמדי בגן עדן׃
מ״ד
ויהי כשעה הששית והנה חשך על כל הארץ עד השעה התשיעית׃
מ״ה
ויחשך השמש ותקרע פרכת ההיכל לשנים קרעים׃
מ״ו
ויקרא ישוע בקול גדול ויאמר אבי בידך אפקיד רוחי ובאמרו זאת נפח נפשו׃
מ״ז
וירא שר המאה את אשר נהיתה ויתן כבוד לאלהים לאמר אכן האיש הזה צדיק היה׃
מ״ח
וכל המון העם אשר התאספו יחד למראה הזה בהביטם אל כל אשר נעשה תופפו על לבביהם וישובו׃
מ״ט
וכל מידעיו עמדו מרחוק וגם הנשים אשר הלכו אתו מן הגליל ועיניהן ראות את אלה׃
Settings