הַבְּשׂוֹרָה הַקְּדוֹשָׁה עַל־פִּי יוֹחָנָן י״ג:ט״ו-ל״ח
ט״ו
כי מופת נתתי לכם למען תעשו גם אתם כאשר עשיתי לכם׃
ט״ז
אמן אמן אני אמר לכם כי העבד איננו גדול מאדניו והשלוח איננו גדול משלחו׃
י״ז
אם ידעתם זאת אשריכם אם כן תעשו׃
י״ח
לא על כלכם דברתי יודע אני את אשר בחרתי בהם אך למען ימלא הכתוב אוכל לחמי הגדיל עלי עקב׃
י״ט
מעתה אני אמר לכם בטרם היותה למען בבואה תאמינו כי אני הוא׃
כ׳
אמן אמן אני אמר לכם כי כל המקבל את אשר אשלחהו אתי הוא מקבל והמקבל אתי הוא מקבל את שלחי׃
כ״א
ויהי ככלות ישוע לדבר הדברים האלה ויבהל ברוחו ויעד ויאמר אמן אמן אני אמר לכם כי אחד מכם ימסרני׃
כ״ב
ויתראו תלמידיו ויתמהו איש אל רעהו לדעת על מי דבר׃
כ״ג
ואחד מתלמידיו מסב על חיק ישוע אשר ישוע אהבו׃
כ״ד
וירמז לו שמעון פטרוס לדרש מי הוא זה אשר דבר עליו׃
כ״ה
ויפל על לב ישוע ויאמר אליו אדני מי הוא׃
כ״ו
ויען ישוע הנה זה הוא אשר אטבל פתי לתתו לו ויטבל את פתו ויתן אל יהודה בן שמעון איש קריות׃
כ״ז
ואחרי בלעו בא השטן אל קרבו ויאמר אליו ישוע את אשר תעשה עשה מהרה׃
כ״ח
ומן המסבים לא ידע איש על מה דבר אליו כזאת׃
כ״ט
כי יש אשר חשבו כי אמר אליו ישוע קנה לנו צרכי החג או לתת לאביונים יען אשר כיס הכסף תחת יד יהודה׃
ל׳
והוא בקחתו את פת הלחם מהר לצאת החוצה ויהי לילה׃
ל״א
הוא יצא וישוע אמר עתה נתפאר בן האדם והאלהים נתפאר בו׃
ל״ב
אם האלהים נתפאר בו גם האלהים הוא יפארהו בעצמו ובמהרה יפארהו׃
ל״ג
בני עוד מעט מזער אהיה עמכם אתם תבקשוני וכאשר אמרתי אל היהודים כי אל אשר אני הולך לא תוכלו לבוא שמה כן אליכם אמר אני עתה׃
ל״ד
מצוה חדשה אני נתן לכם כי תאהבו איש את אחיו כאשר אהבתי אתכם כן גם אתם איש את אחיו תאהבון׃
ל״ה
בזאת ידעו כלם כי תלמידי אתם בהיות אהבה ביניכם׃
ל״ו
ויאמר אליו פטרוס אדני אנה תלך ויען אתו ישוע אל אשר אני הולך שמה לא תוכל עתה ללכת אחרי אך אחרי כן תלך אחרי׃
ל״ז
ויאמר אליו פטרוס מדוע לא אוכל עתה ללכת אחריך הן נפשי בעד נפשך אתן׃
ל״ח
ויען אתו ישוע הכי תתן נפשך בעד נפשי אמן אמן אני אמר לך בטרם יקרא התרנגל תכחש בי שלש פעמים׃
Settings