פסוקים על Missions

ויצו מלך אשור לאמר הליכו שמה אחד מהכהנים אשר הגליתם משם וילכו וישבו שם וירם את משפט אלהי הארץ׃

ויבא אחד מהכהנים אשר הגלו משמרון וישב בבית אל ויהי מורה אתם איך ייראו את יהוה׃

שירו ליהוה כל הארץ בשרו מיום אל יום ישועתו׃

ספרו בגוים את כבודו בכל העמים נפלאתיו׃

על כן אודך בגוים יהוה ולשמך אזמרה׃

¶ שירו ליהוה שיר חדש שירו ליהוה כל הארץ׃

שירו ליהוה ברכו שמו בשרו מיום ליום ישועתו׃

ספרו בגוים כבודו בכל העמים נפלאותיו׃

כי גדול יהוה ומהלל מאד נורא הוא על כל אלהים׃

כי כל אלהי העמים אלילים ויהוה שמים עשה׃

הוד והדר לפניו עז ותפארת במקדשו׃

הבו ליהוה משפחות עמים הבו ליהוה כבוד ועז׃

הבו ליהוה כבוד שמו שאו מנחה ובאו לחצרותיו׃

השתחוו ליהוה בהדרת קדש חילו מפניו כל הארץ׃

אמרו בגוים יהוה מלך אף תכון תבל בל תמוט ידין עמים במישרים׃

ישמחו השמים ותגל הארץ ירעם הים ומלאו׃

יעלז שדי וכל אשר בו אז ירננו כל עצי יער׃

לפני יהוה כי בא כי בא לשפט הארץ ישפט תבל בצדק ועמים באמונתו׃

אמר לצפון תני ולתימן אל תכלאי הביאי בני מרחוק ובנותי מקצה הארץ׃

כל הנקרא בשמי ולכבודי בראתיו יצרתיו אף עשיתיו׃

¶ ויהי דבר יהוה אל יונה שנית לאמר׃

קום לך אל נינוה העיר הגדולה וקרא אליה את הקריאה אשר אנכי דבר אליך׃

ויקם יונה וילך אל נינוה כדבר יהוה ונינוה היתה עיר גדולה לאלהים מהלך שלשת ימים׃

ויחל יונה לבוא בעיר מהלך יום אחד ויקרא ויאמר עוד ארבעים יום ונינוה נהפכת׃

ויאמינו אנשי נינוה באלהים ויקראו צום וילבשו שקים מגדולם ועד קטנם׃