פסוקים על Discipline

25 פסוקים · 1 היבט

פסוקי מפתח

יְהוֹשֻעַ ז׳:י׳
ויאמר יהוה אל יהושע קם לך למה זה אתה נפל על פניך׃
יְהוֹשֻעַ ז׳:י״א
חטא ישראל וגם עברו את בריתי אשר צויתי אותם וגם לקחו מן החרם וגם גנבו וגם כחשו וגם שמו בכליהם׃
יְהוֹשֻעַ ז׳:י״ב
ולא יכלו בני ישראל לקום לפני איביהם ערף יפנו לפני איביהם כי היו לחרם לא אוסיף להיות עמכם אם לא תשמידו החרם מקרבכם׃
יְהוֹשֻעַ ז׳:י״ג
קם קדש את העם ואמרת התקדשו למחר כי כה אמר יהוה אלהי ישראל חרם בקרבך ישראל לא תוכל לקום לפני איביך עד הסירכם החרם מקרבכם׃
יְהוֹשֻעַ ז׳:י״ד
ונקרבתם בבקר לשבטיכם והיה השבט אשר ילכדנו יהוה יקרב למשפחות והמשפחה אשר ילכדנה יהוה תקרב לבתים והבית אשר ילכדנו יהוה יקרב לגברים׃
יְהוֹשֻעַ ז׳:ט״ו
והיה הנלכד בחרם ישרף באש אתו ואת כל אשר לו כי עבר את ברית יהוה וכי עשה נבלה בישראל׃
יְהוֹשֻעַ ז׳:ט״ז
וישכם יהושע בבקר ויקרב את ישראל לשבטיו וילכד שבט יהודה׃
יְהוֹשֻעַ ז׳:י״ז
ויקרב את משפחת יהודה וילכד את משפחת הזרחי ויקרב את משפחת הזרחי לגברים וילכד זבדי׃
יְהוֹשֻעַ ז׳:י״ח
ויקרב את ביתו לגברים וילכד עכן בן כרמי בן זבדי בן זרח למטה יהודה׃
יְהוֹשֻעַ ז׳:י״ט
ויאמר יהושע אל עכן בני שים נא כבוד ליהוה אלהי ישראל ותן לו תודה והגד נא לי מה עשית אל תכחד ממני׃
יְהוֹשֻעַ ז׳:כ׳
ויען עכן את יהושע ויאמר אמנה אנכי חטאתי ליהוה אלהי ישראל וכזאת וכזאת עשיתי׃
יְהוֹשֻעַ ז׳:כ״א
ואראה בשלל אדרת שנער אחת טובה ומאתים שקלים כסף ולשון זהב אחד חמשים שקלים משקלו ואחמדם ואקחם והנם טמונים בארץ בתוך האהלי והכסף תחתיה׃
יְהוֹשֻעַ ז׳:כ״ב
וישלח יהושע מלאכים וירצו האהלה והנה טמונה באהלו והכסף תחתיה׃
יְהוֹשֻעַ ז׳:כ״ג
ויקחום מתוך האהל ויבאום אל יהושע ואל כל בני ישראל ויצקם לפני יהוה׃
יְהוֹשֻעַ ז׳:כ״ד
ויקח יהושע את עכן בן זרח ואת הכסף ואת האדרת ואת לשון הזהב ואת בניו ואת בנתיו ואת שורו ואת חמרו ואת צאנו ואת אהלו ואת כל אשר לו וכל ישראל עמו ויעלו אתם עמק עכור׃
יְהוֹשֻעַ ז׳:כ״ה
ויאמר יהושע מה עכרתנו יעכרך יהוה ביום הזה וירגמו אתו כל ישראל אבן וישרפו אתם באש ויסקלו אתם באבנים׃
יְהוֹשֻעַ ז׳:כ״ו
ויקימו עליו גל אבנים גדול עד היום הזה וישב יהוה מחרון אפו על כן קרא שם המקום ההוא עמק עכור עד היום הזה׃
שֹׁפְטִים כ״א:ה׳
ויאמרו בני ישראל מי אשר לא עלה בקהל מכל שבטי ישראל אל יהוה כי השבועה הגדולה היתה לאשר לא עלה אל יהוה המצפה לאמר מות יומת׃
שֹׁפְטִים כ״א:ו׳
וינחמו בני ישראל אל בנימן אחיו ויאמרו נגדע היום שבט אחד מישראל׃
שֹׁפְטִים כ״א:ז׳
מה נעשה להם לנותרים לנשים ואנחנו נשבענו ביהוה לבלתי תת להם מבנותינו לנשים׃
שֹׁפְטִים כ״א:ח׳
ויאמרו מי אחד משבטי ישראל אשר לא עלה אל יהוה המצפה והנה לא בא איש אל המחנה מיביש גלעד אל הקהל׃
שֹׁפְטִים כ״א:ט׳
ויתפקד העם והנה אין שם איש מיושבי יבש גלעד׃
שֹׁפְטִים כ״א:י׳
וישלחו שם העדה שנים עשר אלף איש מבני החיל ויצוו אותם לאמר לכו והכיתם את יושבי יבש גלעד לפי חרב והנשים והטף׃
שֹׁפְטִים כ״א:י״א
וזה הדבר אשר תעשו כל זכר וכל אשה ידעת משכב זכר תחרימו׃
שֹׁפְטִים כ״א:י״ב
וימצאו מיושבי יביש גלעד ארבע מאות נערה בתולה אשר לא ידעה איש למשכב זכר ויביאו אותם אל המחנה שלה אשר בארץ כנען׃