פסוקים על Ancient Samaria: Besieged by Benhadad

12 פסוקים · 29 היבטים

פסוקים על Besieged by Benhadad

  1. 1 מְלָכִים כ׳:א׳

    ¶ ובן הדד מלך ארם קבץ את כל חילו ושלשים ושנים מלך אתו וסוס ורכב ויעל ויצר על שמרון וילחם בה׃

  2. 1 מְלָכִים כ׳:ב׳

    וישלח מלאכים אל אחאב מלך ישראל העירה׃

  3. 1 מְלָכִים כ׳:ג׳

    ויאמר לו כה אמר בן הדד כספך וזהבך לי הוא ונשיך ובניך הטובים לי הם׃

  4. 1 מְלָכִים כ׳:ד׳

    ויען מלך ישראל ויאמר כדברך אדני המלך לך אני וכל אשר לי׃

  5. 1 מְלָכִים כ׳:ה׳

    וישבו המלאכים ויאמרו כה אמר בן הדד לאמר כי שלחתי אליך לאמר כספך וזהבך ונשיך ובניך לי תתן׃

  6. 1 מְלָכִים כ׳:ו׳

    כי אם כעת מחר אשלח את עבדי אליך וחפשו את ביתך ואת בתי עבדיך והיה כל מחמד עיניך ישימו בידם ולקחו׃

  7. 1 מְלָכִים כ׳:ז׳

    ויקרא מלך ישראל לכל זקני הארץ ויאמר דעו נא וראו כי רעה זה מבקש כי שלח אלי לנשי ולבני ולכספי ולזהבי ולא מנעתי ממנו׃

  8. 1 מְלָכִים כ׳:ח׳

    ויאמרו אליו כל הזקנים וכל העם אל תשמע ולוא תאבה׃

  9. 1 מְלָכִים כ׳:ט׳

    ויאמר למלאכי בן הדד אמרו לאדני המלך כל אשר שלחת אל עבדך בראשנה אעשה והדבר הזה לא אוכל לעשות וילכו המלאכים וישבהו דבר׃

  10. 1 מְלָכִים כ׳:י׳

    וישלח אליו בן הדד ויאמר כה יעשון לי אלהים וכה יוספו אם ישפק עפר שמרון לשעלים לכל העם אשר ברגלי׃

  11. 1 מְלָכִים כ׳:י״א

    ויען מלך ישראל ויאמר דברו אל יתהלל חגר כמפתח׃

  12. 1 מְלָכִים כ׳:י״ב

    ויהי כשמע את הדבר הזה והוא שתה הוא והמלכים בסכות ויאמר אל עבדיו שימו וישימו על העיר׃