God

הבו ליהוה כבוד שמו שאו מנחה ובאו לחצרותיו׃

השתחוו ליהוה בהדרת קדש חילו מפניו כל הארץ׃

אמרו בגוים יהוה מלך אף תכון תבל בל תמוט ידין עמים במישרים׃

לפני יהוה כי בא כי בא לשפט הארץ ישפט תבל בצדק ועמים באמונתו׃

¶ יהוה מלך תגל הארץ ישמחו איים רבים׃

ענן וערפל סביביו צדק ומשפט מכון כסאו׃

אש לפניו תלך ותלהט סביב צריו׃

הרים כדונג נמסו מלפני יהוה מלפני אדון כל הארץ׃

הגידו השמים צדקו וראו כל העמים כבודו׃

יבשו כל עבדי פסל המתהללים באלילים השתחוו לו כל אלהים׃

שמעה ותשמח ציון ותגלנה בנות יהודה למען משפטיך יהוה׃

כי אתה יהוה עליון על כל הארץ מאד נעלית על כל אלהים׃

אהבי יהוה שנאו רע שמר נפשות חסידיו מיד רשעים יצילם׃

שמחו צדיקים ביהוה והודו לזכר קדשו׃

¶ מזמור שירו ליהוה שיר חדש כי נפלאות עשה הושיעה לו ימינו וזרוע קדשו׃

הודיע יהוה ישועתו לעיני הגוים גלה צדקתו׃

זכר חסדו ואמונתו לבית ישראל ראו כל אפסי ארץ את ישועת אלהינו׃

הריעו ליהוה כל הארץ פצחו ורננו וזמרו׃

זמרו ליהוה בכנור בכנור וקול זמרה׃

בחצצרות וקול שופר הריעו לפני המלך יהוה׃

לפני יהוה כי בא לשפט הארץ ישפט תבל בצדק ועמים במישרים׃

¶ יהוה מלך ירגזו עמים ישב כרובים תנוט הארץ׃

יהוה בציון גדול ורם הוא על כל העמים׃

יודו שמך גדול ונורא קדוש הוא׃

ועז מלך משפט אהב אתה כוננת מישרים משפט וצדקה ביעקב אתה עשית׃