God

להשקיט לו מימי רע עד יכרה לרשע שחת׃

כי לא יטש יהוה עמו ונחלתו לא יעזב׃

לולי יהוה עזרתה לי כמעט שכנה דומה נפשי׃

אם אמרתי מטה רגלי חסדך יהוה יסעדני׃

ברב שרעפי בקרבי תנחומיך ישעשעו נפשי׃

היחברך כסא הוות יצר עמל עלי חק׃

ויהי יהוה לי למשגב ואלהי לצור מחסי׃

וישב עליהם את אונם וברעתם יצמיתם יצמיתם יהוה אלהינו׃

¶ לכו נרננה ליהוה נריעה לצור ישענו׃

נקדמה פניו בתודה בזמרות נריע לו׃

כי אל גדול יהוה ומלך גדול על כל אלהים׃

אשר בידו מחקרי ארץ ותועפות הרים לו׃

אשר לו הים והוא עשהו ויבשת ידיו יצרו׃

באו נשתחוה ונכרעה נברכה לפני יהוה עשנו׃

כי הוא אלהינו ואנחנו עם מרעיתו וצאן ידו היום אם בקלו תשמעו׃

אשר נסוני אבותיכם בחנוני גם ראו פעלי׃

ארבעים שנה אקוט בדור ואמר עם תעי לבב הם והם לא ידעו דרכי׃

אשר נשבעתי באפי אם יבאון אל מנוחתי׃

¶ שירו ליהוה שיר חדש שירו ליהוה כל הארץ׃

שירו ליהוה ברכו שמו בשרו מיום ליום ישועתו׃

ספרו בגוים כבודו בכל העמים נפלאותיו׃

כי גדול יהוה ומהלל מאד נורא הוא על כל אלהים׃

כי כל אלהי העמים אלילים ויהוה שמים עשה׃

הוד והדר לפניו עז ותפארת במקדשו׃

הבו ליהוה משפחות עמים הבו ליהוה כבוד ועז׃