Kantiku i Kantikëve1

Titulli dhe hyrja e Kantikut

1
Kantiku i kantikëve që është i Salomonit.

Dëshira e nuses për intimitet

2
Më puth me të puthurat e gojës së vet! Sepse dashuria jote është më e mirë se vera.
3
Nga aroma e vajrave të tua të këndshme emri yt është një vaj i parfumuar i derdhur; prandaj të duan vajzat.
4
Tërhiqmë te ti! Ne do të rendim pas teje! Mbreti më çoi në dhomat e tij. Ne do të kënaqemi dhe do të gëzohemi te ti; ne do ta kujtojmë dashurinë tënde më shumë se verën. Kanë të drejtë që të duan.

Vetëdija dhe bukuria

5
Unë jam e zezë por e bukur, o bija të Jeruzalemit, si çadrat e Kedarit, si perdet e Salomonit.
6
Mos shikoni se jam e zezë, sepse dielli më ka nxirë. Bijtë e nënes sime janë zemëruar me mua; më kanë caktuar të ruaj vreshtat, por vreshtin tim nuk e kam ruajtur.

Kërkimi i të dashurit

7
Thuamë, o ti që të dashuron zemra ime, ku e kullot kopenë dhe ku e lë të pushojë në mesditë. Pse vallë duhet të jem si një grua e mbuluar me vel pranë kopeve të shokëve të tu?

Udhëzim dhe siguri

8
Në rast se ti nuk e di, o më e bukura e grave, ndiq gjurmët e kopesë dhe kulloti kecat e tua pranë çadrave të barinjve.

Lavdërimi i bukurisë së nuses

9
Mikesha ime, ti më ngjan si pela ime midis qerreve të Faraonit.
10
Faqet e tua janë të bukura me ornamente, dhe qafa jote me gjerdane margaritaresh.
11
Ne do të bëjmë për ty gjerdane të arta me tokëza prej argjendi.

Kënaqësi dhe dashuri e ndërsjellë

12
Ndërsa mbreti është ulur në tryezë, livanda ime përhap aromën e saj.
13
Kënaqësia ime është një qeskë e vogël mirre; ajo do të pushojë tërë natën midis gjive të mia.
14
Kënaqësia ime është për mua një tufë lulesh alkane në vreshtat e En-gedit.

Admirimi i ndërsjellë i shprehur

15
Ti je e bukur, mikja ime, ja, je e bukur! Sytë e tu janë si ato të pëllumbeshave.
16
Sa i bukur je, i dashuri im, madje dhe i dashurueshëm! Për më tepër shtrati ynë është blerosh.

Një shtëpi e ndërtuar mbi dashurinë

17
Trarët e shtëpive tona janë prej kedri dhe tavanet tona prej qiparisi.
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options