תְהִלִּים פ״ג - עברית · Modern

א׳

¶ שיר מזמור לאסף אלהים אל דמי לך אל תחרש ואל תשקט אל׃

ב׳

כי הנה אויביך יהמיון ומשנאיך נשאו ראש׃

ג׳

על עמך יערימו סוד ויתיעצו על צפוניך׃

ד׳

אמרו לכו ונכחידם מגוי ולא יזכר שם ישראל עוד׃

ה׳

כי נועצו לב יחדו עליך ברית יכרתו׃

ו׳

אהלי אדום וישמעאלים מואב והגרים׃

ז׳

גבל ועמון ועמלק פלשת עם ישבי צור׃

ח׳

גם אשור נלוה עמם היו זרוע לבני לוט סלה׃

ט׳

עשה להם כמדין כסיסרא כיבין בנחל קישון׃

י׳

נשמדו בעין דאר היו דמן לאדמה׃

י״א

שיתמו נדיבמו כערב וכזאב וכזבח וכצלמנע כל נסיכמו׃

י״ב

אשר אמרו נירשה לנו את נאות אלהים׃

י״ג

אלהי שיתמו כגלגל כקש לפני רוח׃

י״ד

כאש תבער יער וכלהבה תלהט הרים׃

ט״ו

כן תרדפם בסערך ובסופתך תבהלם׃

ט״ז

מלא פניהם קלון ויבקשו שמך יהוה׃

י״ז

יבשו ויבהלו עדי עד ויחפרו ויאבדו׃

י״ח

וידעו כי אתה שמך יהוה לבדך עליון על כל הארץ׃

תְהִלִּיםפ״ג