צליבת ישוע

ל״ב

ויהי בצאתם וימצאו איש קוריני ושמו שמעון ויאנסו אתו לשאת לו את צלבו׃

ל״ג

ויבאו אל המקום הנקרא גלגלתא הוא מקום גלגלת׃

ל״ד

ויתנו לו לשתות חמץ מזוג במרורה ויטעם ולא אבה לשתות׃

ל״ה

ויהי כאשר צלבו אותו ויחלקו להם את בגדיו וגורל הפילו למלאת את אשר נאמר בפי הנביא יחלקו בגדי להם ועל לבושי יפילו גורל׃

ל״ו

וישבו שמה וישמרו אותו׃

ל״ז

וישימו את דבר אשמתו כתוב ממעל לראשו זה הוא ישוע מלך היהודים׃

ל״ח

ויצלבו אתו שני פריצים אחד לימינו ואחד לשמאלו׃

ל״ט

והעברים גדפו אותו ויניעו את ראשם׃

מ׳

ויאמרו אתה ההרס את ההיכל ובנהו בשלשת ימים הושע לנפשך ואם בן האלהים אתה רדה מן הצלב׃

מ״א

וכן הלעיגו גם ראשי הכהנים עם הסופרים והזקנים לאמר׃

מ״ב

את אחרים הושיע ולעצמו לא יוכל להושיע אם מלך ישראל הוא ירד נא עתה מן הצלב ונאמין בו׃

מ״ג

בטח באלהים עתה יפלטהו אם חפץ בו כי אמר בן האלהים אני׃

מ״ד

וגם הפריצים הנצלבים אתו חרפהו כדברים האלה׃

מ״ה

ומשעה הששית היה חשך על כל הארץ עד השעה התשיעית׃

מ״ו

וכעת השעה התשיעית ויצעק ישוע בקול גדול אלי אלי למה שבקתני ותרגומו אלי אלי למה עזבתני׃

מ״ז

ויאמרו מקצת העמדים שם כשמעם את זאת לאמר אל אליהו הוא קורא׃

מ״ח

וימהר אחד מהם וירץ ויקח ספוג וימלא אתו חמץ וישימהו על קנה וישקהו׃

מ״ט

ושאר האנשים אמרו הניחו לו ונראה אם יבוא אליהו להושיעו׃

נ׳

וישוע הוסיף לקרא בקול גדול ותצא רוחו׃