הַבְּשׂוֹרָה הַקְּדוֹשָׁה עַל־פִּי מַתַּי כ״ז:ט״ז-מ׳
ט״ז
ובעת ההיא היה להם אסיר ידוע ושמו בר אבא׃
י״ז
ויהי כאשר נקהלו ויאמר אליהם פילטוס את מי תחפצו כי אפטר לכם את בר אבא או את ישוע הנקרא בשם משיח׃
י״ח
כי ידע אשר רק מקנאה מסרו אתו׃
י״ט
ויהי כשבתו על כסא הדין ותשלח אליו אשתו לאמר אל יהי לך דבר עם הצדיק הזה כי בעבורו עניתי הרבה היום בחלום׃
כ׳
והכהנים הגדולים והזקנים פתו את המון העם לשאל להם את בר אבא ולאבד את ישוע׃
כ״א
ויען ההגמון ויאמר אליהם את מי משניהם תחפצו כי אפטר לכם ויאמרו את בר אבא׃
כ״ב
ויאמר אליהם פילטוס ומה אעשה לישוע הנקרא בשם משיח ויענו כלם יצלב׃
כ״ג
ויאמר ההגמון מה אפוא הרעה אשר עשה ויוסיפו עוד צעק לאמר יצלב׃
כ״ד
ויהי כראות פילטוס כי לא יועיל מאומה ורבתה עוד המהודה ויקח מים וירחץ את ידיו לעיני העם ויאמר נקי אנכי מדם הצדיק הזה אתם תראו׃
כ״ה
ויענו כל העם ויאמרו דמו עלינו ועל בנינו׃
כ״ו
אז פטר להם את בר אבא ואת ישוע הכה בשוטים וימסר אותו להצלב׃
כ״ז
ויקחו אנשי הצבא אשר להגמון את ישוע ויביאהו אל בית המשפט ויאספו עליו את כל הגדוד׃
כ״ח
ויפשיטו אותו את בגדיו ויעטפהו מעיל שני׃
כ״ט
וישרגו קצים ויעשו עטרת וישימו על ראשו וקנה בימינו ויכרעו לפניו ויתלוצצו בו לאמר שלום לך מלך היהודים׃
ל׳
וירקו בו ויקחו את הקנה ויכהו על ראשו׃
ל״א
ואחרי התלוצצם בו הפשיטו אותו את המעיל וילבישהו את בגדיו ויוליכהו לצלב׃
ל״ב
ויהי בצאתם וימצאו איש קוריני ושמו שמעון ויאנסו אתו לשאת לו את צלבו׃
ל״ג
ויבאו אל המקום הנקרא גלגלתא הוא מקום גלגלת׃
ל״ד
ויתנו לו לשתות חמץ מזוג במרורה ויטעם ולא אבה לשתות׃
ל״ה
ויהי כאשר צלבו אותו ויחלקו להם את בגדיו וגורל הפילו למלאת את אשר נאמר בפי הנביא יחלקו בגדי להם ועל לבושי יפילו גורל׃
ל״ו
וישבו שמה וישמרו אותו׃
ל״ז
וישימו את דבר אשמתו כתוב ממעל לראשו זה הוא ישוע מלך היהודים׃
ל״ח
ויצלבו אתו שני פריצים אחד לימינו ואחד לשמאלו׃
ל״ט
והעברים גדפו אותו ויניעו את ראשם׃
מ׳
ויאמרו אתה ההרס את ההיכל ובנהו בשלשת ימים הושע לנפשך ואם בן האלהים אתה רדה מן הצלב׃
Settings