ישוע לפני הסנהדרין

נ״ז

והאנשים אשר תפשו את ישוע הוליכהו אל קיפא הכהן הגדול אשר נקהלו שם הסופרים והזקנים׃

נ״ח

ופטרוס הלך אחריו מרחוק עד לחצר הכהן הגדול ויבא פנימה וישב לו אצל המשרתים לראות את אחרית הדבר׃

נ״ט

והכהנים הגדולים והסופרים וכל הסנהדרין בקשו עדות שקר בישוע להמיתו ולא מצאו׃

ס׳

ואף בעמד שם עדי שקר רבים לא מצאו ובאחרונה נגשו שני עדי שקר׃

ס״א

ויאמרו זה אמר יש ביכלתי להרס את היכל האלהים ולשוב לבנותו בשלשת ימים׃

ס״ב

ויקם הכהן הגדול ויאמר אליו האינך משיב דבר על אשר ענו בך אלה׃

ס״ג

וישוע החריש ויען הכהן הגדול ויאמר לו משביעך אני באלהים חיים שתאמר לנו אם אתה הוא המשיח בן האלהים׃

ס״ד

ויאמר אליו ישוע אתה אמרת אבל אני אמר לכם כי מעתה תראו את בן האדם ישב לימין הגבורה ובא עם ענני השמים׃

ס״ה

ויקרע הכהן הגדול את בגדיו ויאמר הוא גדף ומה לנו עוד לבקש עדים הנה עתה שמעתם את גדופו׃

ס״ו

מה דעתכם ויענו ויאמרו איש מות הוא׃

ס״ז

וירקו בפניו ויכהו באגרוף ואחרים הכהו על הלחי׃

ס״ח

ויאמרו הנבא לנו המשיח מי הוא המכה אותך׃