הַבְּשׂוֹרָה הַקְּדוֹשָׁה עַל־פִּי מַתַּי י״ב:ל״א-נ׳
ל״א
על כן אני אמר לכם כל חטא וגדוף יסלח לאדם אך גדוף הרוח לא יסלח לאדם׃
ל״ב
וכל אשר ידבר דבר חרפה על בן האדם יסלח לו והמחרף את רוח הקדש לא יסלח לו לא בעולם הזה ולא בעולם הבא׃
ל״ג
או עשו את העץ טוב ופריו טוב או עשו את העץ משחת ופריו משחת כי בפריו נכר העץ׃
ל״ד
ילדי הצפעונים איכה תוכלו למלל טוב ואתם רעים כי משפעת הלב ימלל הפה׃
ל״ה
האיש הטוב מאוצר לבו הטוב מוציא את הטוב והאיש הרע מאוצר הרע מוציא רע׃
ל״ו
ואני אמר לכם כל מלה בטלה אשר ידברו בני האדם יתנו עליה חשבון ביום הדין׃
ל״ז
כי מדבריך תצדק ומדבריך תחיב׃
ל״ח
ויענו מן הסופרים והפרושים ויאמרו רבי חפצנו לראות אות מידך׃
ל״ט
ויען ויאמר אליהם דור רע ומנאף מבקש לו אות ואות לא ינתן לו בלתי אם אות יונה הנביא׃
מ׳
כי כאשר היה יונה במעי הדג שלשה ימים ושלשה לילות כן יהיה בן האדם בלב האדמה שלשה ימים ושלשה לילות׃
מ״א
אנשי נינוה יקומו במשפט עם הדור הזה וירשיעוהו כי הם שבו בקריאת יונה והנה פה גדול מיונה׃
מ״ב
מלכת תימן תקום במשפט עם הדור הזה ותרשיענו כי באה מקצות הארץ לשמע את חכמה שלמה והנה פה גדול משלמה׃
מ״ג
והרוח הטמאה אחרי צאתה מן האדם תשטט במקמות ציה לבקש לה מנוחה ולא תמצאנה׃
מ״ד
אז תאמר אשובה אל ביתי אשר יצאתי משם ובאה ומצאה אתו מפנה ומטאטא ומהדר׃
מ״ה
ואחר תלך ולקחה אליה שבע רוחות אחרות רעות ממנה ובאו ושכנו שם והיתה אחרית האדם ההוא רעה מראשיתו כן יהיה גם לדור הרע הזה׃
מ״ו
עודנו מדבר אל המון העם והנה אמו ואחיו עמדו בחוץ מבקשים לדבר אתו׃
מ״ז
ויגד אליו הנה אמך ואחיך עמדים בחוץ ומבקשים לדבר אתך׃
מ״ח
ויען ויאמר אל האיש המגיד לו מי היא אמי ומי הם אחי׃
מ״ט
ויט ידו על תלמידיו ויאמר הנה אמי ואחי׃
נ׳
כי כל אשר יעשה רצון אבי שבשמים הוא אחי ואחותי ואמי׃
Settings