TRV
הבְּשׂוֹרָה הַקְּדוֹשָׁה עַל־פִּי לוּקָס ב׳:א׳-כ׳
א׳
¶ ויהי בימים ההם ותצא דת מאת הקיסר אוגוסטוס לספר את כל ישבי תבל׃
ב׳
וזה המפקד היה הראשון בהיות קוריניוס שליט בסוריא׃
ג׳
וילכו כלם להתפקד איש לעירו׃
ד׳
ויעל גם יוסף מן הגליל מעיר נצרת אל יהודה לעיר דוד הנקראה בית לחם כי היה מבית דוד וממשפחתו׃
ה׳
להתפקד עם מרים המארשה לו והיא הרה׃
ו׳
ויהי בהיותם שם וימלאו ימיה ללדת׃
ז׳
ותלד את בנה הבכור ותחתלהו ותשכיבהו באבוס כי לא היה להם מקום במלון׃
ח׳
ורעים היו בארץ ההיא לנים בשדה ושמרים את משמרות הלילה בעדרם׃
ט׳
והנה מלאך יהוה נצב עליהם וכבוד יהוה הופיע עליהם מסביב וייראו יראה גדולה׃
י׳
ויאמר אליהם המלאך אל תיראו כי הנני מבשר אתכם שמחה גדולה אשר תהיה לכל העם׃
י״א
כי היום ילד לכם בעיר דוד מושיע אשר הוא המשיח האדון׃
י״ב
וזה לכם האות תמצאון ילד מחתל ומנח באבוס׃
י״ג
ויהי פתאם אצל המלאך המון צבא השמים והם משבחים את האלהים ואמרים׃
י״ד
כבוד במרומים לאלהים ובארץ שלום בבני אדם רצונו׃
ט״ו
ויהי כאשר עלו מעליהם המלאכים השמימה ויאמרו הרעים איש אל רעהו נעברה נא עד בית לחם ונראה המעשה הזה אשר הודיענו יהוה׃
ט״ז
וימהרו לבוא וימצאו את מרים ואת יוסף ואת הילד שכב באבוס׃
י״ז
ויראו וישמיעו את הדבר הנאמר אליהם על הגער הזה׃
י״ח
וכל השמעים תמהו על הדברים אשר דברו אליהם הרעים׃
י״ט
ומרים שמרה את הדברים האלה ותחשבם בלבה׃
כ׳
וישובו הרעים מהללים ומשבחים את האלהים על כל אשר שמעו וראו כפי אשר נאמר אליהם׃
Settings