השליט העשיר וחיי העולם

י״ח

וישאלהו קצין אחד לאמר רבי הטוב מה לי לעשות ואירש חיי עולמים׃

י״ט

ויאמר אליו ישוע מדוע קראת לי טוב אין טוב בלתי אחד האלהים׃

כ׳

את המצות אתה יודע לא תנאף לא תרצח לא תגנב לא תענה עד שקר כבד את אביך ואת אמך׃

כ״א

ויאמר את כל אלה שמרתי מנעורי׃

כ״ב

וישמע ישוע ויאמר עוד אחת חסרת מכר את כל אשר לך וחלק לעניים ויהי לך אוצר בשמים ובוא ולך אחרי׃

כ״ג

ויהי כשמעו את זאת ויעצב מאד כי עשר גדול היה לו׃

כ״ד

וירא ישוע כי נעצב ויאמר כמה יקשה לבעלי נכסים לבוא אל מלכות האלהים׃

כ״ה

כי נקל לגמל עבר בתוך נקב המחט מבוא עשיר אל מלכות האלהים׃

כ״ו

ויאמרו השמעים ומי יוכל להושע׃

כ״ז

ויאמר מה שיפלא מבני אדם לא יפלא מאלהים׃

כ״ח

ויאמר פטרוס הן אנחנו עזבנו את הכל ונלך אחריך׃

כ״ט

ויאמר אליהם אמן אמר אני לכם אין איש אשר עזב את ביתו או את אבותיו או את אחיו או את אשתו או את בניו למען מלכות האלהים׃

ל׳

ולא יקח תחתיהם כפלים הרבה בעולם הזה ובעולם הבא חיי עולמים׃