פסוקים על Theft and Thieves

לא תגנב׃

וגנב איש ומכרו ונמצא בידו מות יומת׃

¶ כי יגנב איש שור או שה וטבחו או מכרו חמשה בקר ישלם תחת השור וארבע צאן תחת השה׃

אם במחתרת ימצא הגנב והכה ומת אין לו דמים׃

אם זרחה השמש עליו דמים לו שלם ישלם אם אין לו ונמכר בגנבתו׃

אם המצא תמצא בידו הגנבה משור עד חמור עד שה חיים שנים ישלם׃

כי יתן איש אל רעהו חמור או שור או שה וכל בהמה לשמר ומת או נשבר או נשבה אין ראה׃

שבעת יהוה תהיה בין שניהם אם לא שלח ידו במלאכת רעהו ולקח בעליו ולא ישלם׃

ואם גנב יגנב מעמו ישלם לבעליו׃

אם טרף יטרף יבאהו עד הטרפה לא ישלם׃

וכי ישאל איש מעם רעהו ונשבר או מת בעליו אין עמו שלם ישלם׃

אם בעליו עמו לא ישלם אם שכיר הוא בא בשכרו׃

נפש כי תחטא ומעלה מעל ביהוה וכחש בעמיתו בפקדון או בתשומת יד או בגזל או עשק את עמיתו׃

או מצא אבדה וכחש בה ונשבע על שקר על אחת מכל אשר יעשה האדם לחטא בהנה׃

והיה כי יחטא ואשם והשיב את הגזלה אשר גזל או את העשק אשר עשק או את הפקדון אשר הפקד אתו או את האבדה אשר מצא׃

או מכל אשר ישבע עליו לשקר ושלם אתו בראשו וחמשתיו יסף עליו לאשר הוא לו יתננו ביום אשמתו׃

ואת אשמו יביא ליהוה איל תמים מן הצאן בערכך לאשם אל הכהן׃

וכפר עליו הכהן לפני יהוה ונסלח לו על אחת מכל אשר יעשה לאשמה בה׃

לא תגנבו ולא תכחשו ולא תשקרו איש בעמיתו׃

לא תעשק את רעך ולא תגזל לא תלין פעלת שכיר אתך עד בקר׃

ולא תגנב׃

כי תבא בכרם רעך ואכלת ענבים כנפשך שבעך ואל כליך לא תתן׃

כי תבא בקמת רעך וקטפת מלילת בידך וחרמש לא תניף על קמת רעך׃

אם ראית גנב ותרץ עמו ועם מנאפים חלקך׃

אל תבטחו בעשק ובגזל אל תהבלו חיל כי ינוב אל תשיתו לב׃