פסוקים על The Tribe Of Manasseh

בן פרת יוסף בן פרת עלי עין בנות צעדה עלי שור׃

וימררהו ורבו וישטמהו בעלי חצים׃

ותשב באיתן קשתו ויפזו זרעי ידיו מידי אביר יעקב משם רעה אבן ישראל׃

מאל אביך ויעזרך ואת שדי ויברכך ברכת שמים מעל ברכת תהום רבצת תחת ברכת שדים ורחם׃

ברכת אביך גברו על ברכת הורי עד תאות גבעת עולם תהיין לראש יוסף ולקדקד נזיר אחיו׃

ביום השמיני נשיא לבני מנשה גמליאל בן פדהצור׃

קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן למנחה׃

כף אחת עשרה זהב מלאה קטרת׃

פר אחד בן בקר איל אחד כבש אחד בן שנתו לעלה׃

שעיר עזים אחד לחטאת׃

ולזבח השלמים בקר שנים אילם חמשה עתדים חמשה כבשים בני שנה חמשה זה קרבן גמליאל בן פדהצור׃

בני מנשה למכיר משפחת המכירי ומכיר הוליד את גלעד לגלעד משפחת הגלעדי׃

אלה בני גלעד איעזר משפחת האיעזרי לחלק משפחת החלקי׃

ואשריאל משפחת האשראלי ושכם משפחת השכמי׃

ושמידע משפחת השמידעי וחפר משפחת החפרי׃

וצלפחד בן חפר לא היו לו בנים כי אם בנות ושם בנות צלפחד מחלה ונעה חגלה מלכה ותרצה׃

¶ ותקרבנה בנות צלפחד בן חפר בן גלעד בן מכיר בן מנשה למשפחת מנשה בן יוסף ואלה שמות בנתיו מחלה נעה וחגלה ומלכה ותרצה׃

ותעמדנה לפני משה ולפני אלעזר הכהן ולפני הנשיאם וכל העדה פתח אהל מועד לאמר׃

אבינו מת במדבר והוא לא היה בתוך העדה הנועדים על יהוה בעדת קרח כי בחטאו מת ובנים לא היו לו׃

למה יגרע שם אבינו מתוך משפחתו כי אין לו בן תנה לנו אחזה בתוך אחי אבינו׃

ויקרב משה את משפטן לפני יהוה׃

ויאמר יהוה אל משה לאמר׃

כן בנות צלפחד דברת נתן תתן להם אחזת נחלה בתוך אחי אביהם והעברת את נחלת אביהן להן׃

וילכו בני מכיר בן מנשה גלעדה וילכדה ויורש את האמרי אשר בה׃

ויתן משה את הגלעד למכיר בן מנשה וישב בה׃