פסוקים על Prisoners: Jeremiah

24 פסוקים · 22 היבטים

פסוקים על Jeremiah

יִרְמְיָהוּ ל״ח:ו׳
ויקחו את ירמיהו וישלכו אתו אל הבור מלכיהו בן המלך אשר בחצר המטרה וישלחו את ירמיהו בחבלים ובבור אין מים כי אם טיט ויטבע ירמיהו בטיט׃
יִרְמְיָהוּ ל״ח:ז׳
וישמע עבד מלך הכושי איש סריס והוא בבית המלך כי נתנו את ירמיהו אל הבור והמלך יושב בשער בנימן׃
יִרְמְיָהוּ ל״ח:ח׳
ויצא עבד מלך מבית המלך וידבר אל המלך לאמר׃
יִרְמְיָהוּ ל״ח:ט׳
אדני המלך הרעו האנשים האלה את כל אשר עשו לירמיהו הנביא את אשר השליכו אל הבור וימת תחתיו מפני הרעב כי אין הלחם עוד בעיר׃
יִרְמְיָהוּ ל״ח:י׳
ויצוה המלך את עבד מלך הכושי לאמר קח בידך מזה שלשים אנשים והעלית את ירמיהו הנביא מן הבור בטרם ימות׃
יִרְמְיָהוּ ל״ח:י״א
ויקח עבד מלך את האנשים בידו ויבא בית המלך אל תחת האוצר ויקח משם בלוי הסחבות ובלוי מלחים וישלחם אל ירמיהו אל הבור בחבלים׃
יִרְמְיָהוּ ל״ח:י״ב
ויאמר עבד מלך הכושי אל ירמיהו שים נא בלואי הסחבות והמלחים תחת אצלות ידיך מתחת לחבלים ויעש ירמיהו כן׃
יִרְמְיָהוּ ל״ח:י״ג
וימשכו את ירמיהו בחבלים ויעלו אתו מן הבור וישב ירמיהו בחצר המטרה׃
יִרְמְיָהוּ ל״ח:י״ד
וישלח המלך צדקיהו ויקח את ירמיהו הנביא אליו אל מבוא השלישי אשר בבית יהוה ויאמר המלך אל ירמיהו שאל אני אתך דבר אל תכחד ממני דבר׃
יִרְמְיָהוּ ל״ח:ט״ו
ויאמר ירמיהו אל צדקיהו כי אגיד לך הלוא המת תמיתני וכי איעצך לא תשמע אלי׃
יִרְמְיָהוּ ל״ח:ט״ז
וישבע המלך צדקיהו אל ירמיהו בסתר לאמר חי יהוה את אשר עשה לנו את הנפש הזאת אם אמיתך ואם אתנך ביד האנשים האלה אשר מבקשים את נפשך׃
יִרְמְיָהוּ ל״ח:י״ז
ויאמר ירמיהו אל צדקיהו כה אמר יהוה אלהי צבאות אלהי ישראל אם יצא תצא אל שרי מלך בבל וחיתה נפשך והעיר הזאת לא תשרף באש וחיתה אתה וביתך׃
יִרְמְיָהוּ ל״ח:י״ח
ואם לא תצא אל שרי מלך בבל ונתנה העיר הזאת ביד הכשדים ושרפוה באש ואתה לא תמלט מידם׃
יִרְמְיָהוּ ל״ח:י״ט
ויאמר המלך צדקיהו אל ירמיהו אני דאג את היהודים אשר נפלו אל הכשדים פן יתנו אתי בידם והתעללו בי׃
יִרְמְיָהוּ ל״ח:כ׳
ויאמר ירמיהו לא יתנו שמע נא בקול יהוה לאשר אני דבר אליך וייטב לך ותחי נפשך׃
יִרְמְיָהוּ ל״ח:כ״א
ואם מאן אתה לצאת זה הדבר אשר הראני יהוה׃
יִרְמְיָהוּ ל״ח:כ״ב
והנה כל הנשים אשר נשארו בבית מלך יהודה מוצאות אל שרי מלך בבל והנה אמרות הסיתוך ויכלו לך אנשי שלמך הטבעו בבץ רגלך נסגו אחור׃
יִרְמְיָהוּ ל״ח:כ״ג
ואת כל נשיך ואת בניך מוצאים אל הכשדים ואתה לא תמלט מידם כי ביד מלך בבל תתפש ואת העיר הזאת תשרף באש׃
יִרְמְיָהוּ ל״ח:כ״ד
ויאמר צדקיהו אל ירמיהו איש אל ידע בדברים האלה ולא תמות׃
יִרְמְיָהוּ ל״ח:כ״ה
וכי ישמעו השרים כי דברתי אתך ובאו אליך ואמרו אליך הגידה נא לנו מה דברת אל המלך אל תכחד ממנו ולא נמיתך ומה דבר אליך המלך׃
יִרְמְיָהוּ ל״ח:כ״ו
ואמרת אליהם מפיל אני תחנתי לפני המלך לבלתי השיבני בית יהונתן למות שם׃
יִרְמְיָהוּ ל״ח:כ״ז
ויבאו כל השרים אל ירמיהו וישאלו אתו ויגד להם ככל הדברים האלה אשר צוה המלך ויחרשו ממנו כי לא נשמע הדבר׃
יִרְמְיָהוּ ל״ח:כ״ח
וישב ירמיהו בחצר המטרה עד יום אשר נלכדה ירושלם והיה כאשר נלכדה ירושלם׃
יִרְמְיָהוּ ל״ט:י״ד
וישלחו ויקחו את ירמיהו מחצר המטרה ויתנו אתו אל גדליהו בן אחיקם בן שפן להוצאהו אל הבית וישב בתוך העם׃