פסוקים על Egypt

328 פסוקים · 105 היבטים

פסוקי מפתח

סינון לפי ספר
  1. שְׁמֹות ה׳:כ״א

    ויאמרו אלהם ירא יהוה עליכם וישפט אשר הבאשתם את ריחנו בעיני פרעה ובעיני עבדיו לתת חרב בידם להרגנו׃

  2. שְׁמֹות ה׳:כ״ב

    וישב משה אל יהוה ויאמר אדני למה הרעתה לעם הזה למה זה שלחתני׃

  3. שְׁמֹות ה׳:כ״ג

    ומאז באתי אל פרעה לדבר בשמך הרע לעם הזה והצל לא הצלת את עמך׃

  4. שְׁמֹות י״ב:א׳

    ¶ ויאמר יהוה אל משה ואל אהרן בארץ מצרים לאמר׃

  5. שְׁמֹות י״ב:ב׳

    החדש הזה לכם ראש חדשים ראשון הוא לכם לחדשי השנה׃

  6. שְׁמֹות י״ב:ג׳

    דברו אל כל עדת ישראל לאמר בעשר לחדש הזה ויקחו להם איש שה לבית אבת שה לבית׃

  7. שְׁמֹות י״ב:ד׳

    ואם ימעט הבית מהית משה ולקח הוא ושכנו הקרב אל ביתו במכסת נפשת איש לפי אכלו תכסו על השה׃

  8. שְׁמֹות י״ב:ה׳

    שה תמים זכר בן שנה יהיה לכם מן הכבשים ומן העזים תקחו׃

  9. שְׁמֹות י״ב:ו׳

    והיה לכם למשמרת עד ארבעה עשר יום לחדש הזה ושחטו אתו כל קהל עדת ישראל בין הערבים׃

  10. שְׁמֹות י״ב:ז׳

    ולקחו מן הדם ונתנו על שתי המזוזת ועל המשקוף על הבתים אשר יאכלו אתו בהם׃

  11. שְׁמֹות י״ב:ח׳

    ואכלו את הבשר בלילה הזה צלי אש ומצות על מררים יאכלהו׃

  12. שְׁמֹות י״ב:ט׳

    אל תאכלו ממנו נא ובשל מבשל במים כי אם צלי אש ראשו על כרעיו ועל קרבו׃

  13. שְׁמֹות י״ב:י׳

    ולא תותירו ממנו עד בקר והנתר ממנו עד בקר באש תשרפו׃

  14. שְׁמֹות י״ב:י״א

    וככה תאכלו אתו מתניכם חגרים נעליכם ברגליכם ומקלכם בידכם ואכלתם אתו בחפזון פסח הוא ליהוה׃

  15. שְׁמֹות י״ב:י״ב

    ועברתי בארץ מצרים בלילה הזה והכיתי כל בכור בארץ מצרים מאדם ועד בהמה ובכל אלהי מצרים אעשה שפטים אני יהוה׃

  16. שְׁמֹות י״ב:י״ג

    והיה הדם לכם לאת על הבתים אשר אתם שם וראיתי את הדם ופסחתי עלכם ולא יהיה בכם נגף למשחית בהכתי בארץ מצרים׃

  17. שְׁמֹות י״ב:י״ד

    והיה היום הזה לכם לזכרון וחגתם אתו חג ליהוה לדרתיכם חקת עולם תחגהו׃

  18. שְׁמֹות י״ב:ט״ו

    שבעת ימים מצות תאכלו אך ביום הראשון תשביתו שאר מבתיכם כי כל אכל חמץ ונכרתה הנפש ההוא מישראל מיום הראשן עד יום השבעי׃

  19. שְׁמֹות י״ב:ט״ז

    וביום הראשון מקרא קדש וביום השביעי מקרא קדש יהיה לכם כל מלאכה לא יעשה בהם אך אשר יאכל לכל נפש הוא לבדו יעשה לכם׃

  20. שְׁמֹות י״ב:י״ז

    ושמרתם את המצות כי בעצם היום הזה הוצאתי את צבאותיכם מארץ מצרים ושמרתם את היום הזה לדרתיכם חקת עולם׃

  21. שְׁמֹות י״ב:י״ח

    בראשן בארבעה עשר יום לחדש בערב תאכלו מצת עד יום האחד ועשרים לחדש בערב׃

  22. שְׁמֹות י״ב:י״ט

    שבעת ימים שאר לא ימצא בבתיכם כי כל אכל מחמצת ונכרתה הנפש ההוא מעדת ישראל בגר ובאזרח הארץ׃

  23. שְׁמֹות י״ב:כ׳

    כל מחמצת לא תאכלו בכל מושבתיכם תאכלו מצות׃

  24. שְׁמֹות י״ב:כ״א

    ויקרא משה לכל זקני ישראל ויאמר אלהם משכו וקחו לכם צאן למשפחתיכם ושחטו הפסח׃

  25. שְׁמֹות י״ב:כ״ב

    ולקחתם אגדת אזוב וטבלתם בדם אשר בסף והגעתם אל המשקוף ואל שתי המזוזת מן הדם אשר בסף ואתם לא תצאו איש מפתח ביתו עד בקר׃