פסוקים על Cyrus

27 פסוקים · 2 היבטים

פסוקי מפתח

סינון לפי ספר
  1. 2 דִּבְרֵי הַיָּמִים ל״ו:כ״ב

    ובשנת אחת לכורש מלך פרס לכלות דבר יהוה בפי ירמיהו העיר יהוה את רוח כורש מלך פרס ויעבר קול בכל מלכותו וגם במכתב לאמר׃

  2. 2 דִּבְרֵי הַיָּמִים ל״ו:כ״ג

    כה אמר כורש מלך פרס כל ממלכות הארץ נתן לי יהוה אלהי השמים והוא פקד עלי לבנות לו בית בירושלם אשר ביהודה מי בכם מכל עמו יהוה אלהיו עמו ויעל׃

  3. עֶזְרָא א׳:א׳

    ¶ ובשנת אחת לכורש מלך פרס לכלות דבר יהוה מפי ירמיה העיר יהוה את רוח כרש מלך פרס ויעבר קול בכל מלכותו וגם במכתב לאמר׃

  4. עֶזְרָא א׳:ב׳

    כה אמר כרש מלך פרס כל ממלכות הארץ נתן לי יהוה אלהי השמים והוא פקד עלי לבנות לו בית בירושלם אשר ביהודה׃

  5. עֶזְרָא א׳:ג׳

    מי בכם מכל עמו יהי אלהיו עמו ויעל לירושלם אשר ביהודה ויבן את בית יהוה אלהי ישראל הוא האלהים אשר בירושלם׃

  6. עֶזְרָא א׳:ד׳

    וכל הנשאר מכל המקמות אשר הוא גר שם ינשאוהו אנשי מקמו בכסף ובזהב וברכוש ובבהמה עם הנדבה לבית האלהים אשר בירושלם׃

  7. עֶזְרָא א׳:ה׳

    ויקומו ראשי האבות ליהודה ובנימן והכהנים והלוים לכל העיר האלהים את רוחו לעלות לבנות את בית יהוה אשר בירושלם׃

  8. עֶזְרָא א׳:ו׳

    וכל סביבתיהם חזקו בידיהם בכלי כסף בזהב ברכוש ובבהמה ובמגדנות לבד על כל התנדב׃

  9. עֶזְרָא א׳:ז׳

    והמלך כורש הוציא את כלי בית יהוה אשר הוציא נבוכדנצר מירושלם ויתנם בבית אלהיו׃

  10. עֶזְרָא א׳:ח׳

    ויוציאם כורש מלך פרס על יד מתרדת הגזבר ויספרם לששבצר הנשיא ליהודה׃

  11. עֶזְרָא א׳:ט׳

    ואלה מספרם אגרטלי זהב שלשים אגרטלי כסף אלף מחלפים תשעה ועשרים׃

  12. עֶזְרָא א׳:י׳

    כפורי זהב שלשים כפורי כסף משנים ארבע מאות ועשרה כלים אחרים אלף׃

  13. עֶזְרָא א׳:י״א

    כל כלים לזהב ולכסף חמשת אלפים וארבע מאות הכל העלה ששבצר עם העלות הגולה מבבל לירושלם׃

  14. עֶזְרָא ה׳:י״ג

    ברם בשנת חדה לכורש מלכא די בבל כורש מלכא שם טעם בית אלהא דנה לבנא׃

  15. עֶזְרָא ה׳:י״ד

    ואף מאניא די בית אלהא די דהבה וכספא די נבוכדנצר הנפק מן היכלא די בירושלם והיבל המו להיכלא די בבל הנפק המו כורש מלכא מן היכלא די בבל ויהיבו לששבצר שמה די פחה שמה׃

  16. יְשַׁעְיָהוּ י״ג:י״ז

    הנני מעיר עליהם את מדי אשר כסף לא יחשבו וזהב לא יחפצו בו׃

  17. יְשַׁעְיָהוּ י״ג:י״ח

    וקשתות נערים תרטשנה ופרי בטן לא ירחמו על בנים לא תחוס עינם׃

  18. יְשַׁעְיָהוּ י״ג:י״ט

    והיתה בבל צבי ממלכות תפארת גאון כשדים כמהפכת אלהים את סדם ואת עמרה׃

  19. יְשַׁעְיָהוּ י״ג:כ׳

    לא תשב לנצח ולא תשכן עד דור ודור ולא יהל שם ערבי ורעים לא ירבצו שם׃

  20. יְשַׁעְיָהוּ י״ג:כ״א

    ורבצו שם ציים ומלאו בתיהם אחים ושכנו שם בנות יענה ושעירים ירקדו שם׃

  21. יְשַׁעְיָהוּ י״ג:כ״ב

    וענה איים באלמנותיו ותנים בהיכלי ענג וקרוב לבוא עתה וימיה לא ימשכו׃

  22. יְשַׁעְיָהוּ מ״ה:א׳

    ¶ כה אמר יהוה למשיחו לכורש אשר החזקתי בימינו לרד לפניו גוים ומתני מלכים אפתח לפתח לפניו דלתים ושערים לא יסגרו׃

  23. יְשַׁעְיָהוּ מ״ה:ב׳

    אני לפניך אלך והדורים אושר דלתות נחושה אשבר ובריחי ברזל אגדע׃

  24. יְשַׁעְיָהוּ מ״ה:ג׳

    ונתתי לך אוצרות חשך ומטמני מסתרים למען תדע כי אני יהוה הקורא בשמך אלהי ישראל׃

  25. יְשַׁעְיָהוּ מ״ה:ד׳

    למען עבדי יעקב וישראל בחירי ואקרא לך בשמך אכנך ולא ידעתני׃