Jesus

וישמע ישוע כי הדפהו החוצה ויפגשהו ויאמר אליו התאמין בבן האדם׃

ויען ויאמר מי הוא זה אדני למען אאמין בו׃

ויאמר אליו ישוע הן ראית אתו והמדבר אליך הנה זה הוא׃

ויאמר אני מאמין אדני וישתחו לו׃

ויאמר ישוע אני לדין באתי לעולם הזה למען יראו העורים והראים יכו בעורון׃

ואשר היו עמו מן הפרושים שמעו דבריו ויאמרו אליו הגם אנחנו עורים׃

ויאמר אליהם אם עורים הייתם לא היה בכם חטא ועתה כי אמרתם פקחים אנחנו חטאתכם תעמד׃

¶ אמן אמן אני אמר לכם איש אשר לא יבוא דרך השער אל מכלא הצאן כי אם יעלה בדרך אחר גנב ופריץ הוא׃

המשל הזה דבר ישוע באזניהם והמה לא ידעו מה זאת אשר אמר אליהם׃

ויוסף ישוע וידבר אליהם אמן אמן אני אמר לכם אני הוא דלת הצאן׃

כל אשר באו לפני גנבים המה ופריצים והצאן לא שמעו לקולם׃

אנכי הדלת איש כי יבוא בי יושע ובצאתו ובבואו ימצא מרעה׃

הגנב לא יבוא כי אם לגנוב ולהרוג ולאבד ואני באתי לבעבור הביא להם חיים ומלא ספקם׃

אנכי הוא הרעה הטוב הרעה הטוב יתן את נפשו בעד צאנו׃

אני הרעה הטוב וידעתי את אשר לי ונודעתי לאשר לי׃

כאשר האב ידעני ואני ידעתי את האב ואת נפשי אתן בעד הצאן׃

וצאן אחרות יש לי אשר אינן מן המכלה הזאת ועלי לנהל גם אתן ותשמענה קולי והיה עדר אחד ורעה אחד׃

על כן אהב אתי אבי כי את נפשי אתן למען אשוב ואקחה׃

ואיש לא יקחנה מאתי כי אם אני מעצמי אתננה יש בידי לתת אתה ובידי לשוב לקחתה את המצוה הזאת לקחתי מעם אבי׃

ויאמרו רבים מהם שד בו ומשגע הוא למה תשמעו אליו׃

ויתהלך ישוע במקדש באולם של שלמה׃

ויסבו אתו היהודים ויאמרו אליו עד אנה תתלה את נפשנו את המשיח אתה הגידה לנו ברור׃

ויען אתם ישוע הן אמרתי אליכם ולא האמנתם בי המעשים אשר אני עשה בשם אבי הם יעידו עלי׃

אבל אתם לא תאמינו יען לא מצאני אתם כאשר אמרתי לכם׃

צאני תשמענה את קולי ואני ידעתין ואחרי תלכנה׃