God

ברוך אדני יום יום יעמס לנו האל ישועתנו סלה׃

האל לנו אל למושעות וליהוה אדני למות תוצאות׃

אך אלהים ימחץ ראש איביו קדקד שער מתהלך באשמיו׃

אמר אדני מבשן אשיב אשיב ממצלות ים׃

ראו הליכותיך אלהים הליכות אלי מלכי בקדש׃

במקהלות ברכו אלהים יהוה ממקור ישראל׃

צוה אלהיך עזך עוזה אלהים זו פעלת לנו׃

מהיכלך על ירושלם לך יובילו מלכים שי׃

גער חית קנה עדת אבירים בעגלי עמים מתרפס ברצי כסף בזר עמים קרבות יחפצו׃

יאתיו חשמנים מני מצרים כוש תריץ ידיו לאלהים׃

ממלכות הארץ שירו לאלהים זמרו אדני סלה׃

לרכב בשמי שמי קדם הן יתן בקולו קול עז׃

תנו עז לאלהים על ישראל גאותו ועזו בשחקים׃

נורא אלהים ממקדשיך אל ישראל הוא נתן עז ותעצמות לעם ברוך אלהים׃

¶ למנצח על שושנים לדוד הושיעני אלהים כי באו מים עד נפש׃

יגעתי בקראי נחר גרוני כלו עיני מיחל לאלהי׃

אלהים אתה ידעת לאולתי ואשמותי ממך לא נכחדו׃

אל יבשו בי קויך אדני יהוה צבאות אל יכלמו בי מבקשיך אלהי ישראל׃

כי עליך נשאתי חרפה כסתה כלמה פני׃

כי קנאת ביתך אכלתני וחרפות חורפיך נפלו עלי׃

ואני תפלתי לך יהוה עת רצון אלהים ברב חסדך ענני באמת ישעך׃

ענני יהוה כי טוב חסדך כרב רחמיך פנה אלי׃

ואל תסתר פניך מעבדך כי צר לי מהר ענני׃

אתה ידעת חרפתי ובשתי וכלמתי נגדך כל צוררי׃

שפך עליהם זעמך וחרון אפך ישיגם׃