God

¶ למנצח מזמור לדוד שיר לך דמיה תהלה אלהים בציון ולך ישלם נדר׃

שמע תפלה עדיך כל בשר יבאו׃

דברי עונת גברו מני פשעינו אתה תכפרם׃

אשרי תבחר ותקרב ישכן חצריך נשבעה בטוב ביתך קדש היכלך׃

נוראות בצדק תעננו אלהי ישענו מבטח כל קצוי ארץ וים רחקים׃

מכין הרים בכחו נאזר בגבורה׃

וייראו ישבי קצות מאותתיך מוצאי בקר וערב תרנין׃

פקדת הארץ ותשקקה רבת תעשרנה פלג אלהים מלא מים תכין דגנם כי כן תכינה׃

תלמיה רוה נחת גדודיה ברביבים תמגגנה צמחה תברך׃

עטרת שנת טובתך ומעגליך ירעפון דשן׃

¶ למנצח שיר מזמור הריעו לאלהים כל הארץ׃

זמרו כבוד שמו שימו כבוד תהלתו׃

אמרו לאלהים מה נורא מעשיך ברב עזך יכחשו לך איביך׃

כל הארץ ישתחוו לך ויזמרו לך יזמרו שמך סלה׃

לכו וראו מפעלות אלהים נורא עלילה על בני אדם׃

הפך ים ליבשה בנהר יעברו ברגל שם נשמחה בו׃

משל בגבורתו עולם עיניו בגוים תצפינה הסוררים אל ירימו למו סלה׃

ברכו עמים אלהינו והשמיעו קול תהלתו׃

כי בחנתנו אלהים צרפתנו כצרף כסף׃

הבאתנו במצודה שמת מועקה במתנינו׃

הרכבת אנוש לראשנו באנו באש ובמים ותוציאנו לרויה׃

אבוא ביתך בעולות אשלם לך נדרי׃

לכו שמעו ואספרה כל יראי אלהים אשר עשה לנפשי׃

אליו פי קראתי ורומם תחת לשוני׃

און אם ראיתי בלבי לא ישמע אדני׃