מַעֲשֵׂי הַשְּׁלִיחִיםכ״ב

הגנת פאולוס וייחוסו היהודי

א׳
אנשים אחים ואבות שמעו נא את דברי התנצלותי אליכם׃
ב׳
ויהי כשמעם כי הוא מדבר אליהם בלשון עברית ויחשו עוד יותר׃
ג׳
ויאמר איש יהודי אנכי נולד בטרסוס אשר בקיליקיא ומגדל בעיר הזאת לרגלי גמליאל ומלמד לפי דקדוקי תורת אבותינו ואהי מקנא לאלהים כמוכם כלכם היום׃
ד׳
וארדף את הדרך הזאת עד מות ואהי אסר ומסגיר לכלא אנשים ונשים׃
ה׳
כאשר גם יעיד עלי הכהן הגדול וכל בית הזקנים אשר מהם לקחתי מכתבים ואלך אל האחים לדמשק לאסר אף את הנמצאים שמה להביאם ירושלים למען יוסרו׃

פאולוס מספר על המרתו

ו׳
ויהי אנכי הלך וקרב לדמשק כעת צהרים ופתאם נגה עלי מסביב אור גדול מן השמים׃
ז׳
ואפל ארצה ואשמע קול מדבר אלי שאול שאול למה תרדפני׃
ח׳
ואען ואמר מי אתה אדני ויאמר אלי אני ישוע הנצרי אשר אתה רדפו׃
ט׳
והאנשים אשר אתי ראו את האור וייראו ואת קול המדבר אלי לא שמעו׃
י׳
ואמר מה אעשה אדני ויאמר אלי האדון קום לך אל דמשק ושם יאמר לך את כל אשר צוית לעשות׃
י״א
ואני לא יכלתי לראות מפני זהר האור ההוא והאנשים אשר אתי הוליכוני ביד ואבא לדמשק׃
י״ב
ואיש חסיד כפי התורה ושמו חנניה אשר קנה לו שם טוב בקרב כל היהודים הישבים שם׃
י״ג
ויבא אלי ויעמד ויאמר אלי שאול אחי שוב ראה ובשעה ההיא נפקחו עיני וראיתיהו׃
י״ד
ויאמר אלהי אבותינו בחר בך לדעת את רצונו ולראות את הצדיק ולשמע קול מפיהו׃
ט״ו
כי היו תהיה לו לעד אל כל בני האדם על כל אשר ראית ושמעת׃
ט״ז
ועתה למה תתמהמה קום והטבל והתרחץ מחטאתיך בקראך בשמו׃

החזון במקדש והשליחות אל הגויים

י״ז
ויהי בשובי אל ירושלים ואתפלל במקדש ותהי עלי יד יהוה׃
י״ח
וארא אותו מדבר אלי חושה צא במהרה מירושלים כי לא יקבלו את עדותך עלי׃
י״ט
ואמר הלא הם יודעים את אשר השלכתי אל הכלא והלקיתי בבתי הכנסיות את המאמינים בך׃
כ׳
ובהשפך דם אסטפנוס עדך אף אני עמדתי שם חפץ בהרגתו ושומר את בגדי הרגיו׃
כ״א
ויאמר אלי לך כי אני אל הגיום עד למרחוק אשלחך׃

זעם ההמון; פאולוס טוען לזכויותיו כרומי

כ״ב
וישמעו אליו עד הדבר הזה וישאו את קולם ויאמרו הסירו איש כזה מעל האדמה כי איננו ראוי כי יחיה׃
כ״ג
ויהי בהיותם צעקים ומשליכים את בגדיהם מעליהם וזרקים עפר השמימה׃
כ״ד
ויצו שר האלף להוליכו אל המצד ויאמר לבדקו במלקות למען ידע מדוע המה ככה צעקים עליו׃
כ״ה
ויהי כאשר אסר להכותו ברצועות ויאמר אל שר המאה העמד עליו האף רשיון לכם להכות איש רומי בלא דין ומשפט׃
כ״ו
וילך שר המאה כשמעו את הדבר הזה ויגד לשר האלף לאמר ראה מה תעשה כי האיש הזה רומי הוא׃
כ״ז
ויבא שר האלף ויאמר אמר לי הרומי אתה ויאמר הן׃
כ״ח
ויען שר האלף אני בכסף רב קניתי לי משפט האזרחות הזאת ויאמר פולוס ואני אף נולדתי בה׃
כ״ט
אז הרפו ממנו האנשים אשר באו לבדקו וגם שר האלף ירא בדעתו כי רומי הוא והוא אסר אותו׃

פאולוס נשלח לפני הסנהדרין

ל׳
וממחרת בקש לדעת אל נכון על מה שטנים אותו היהודים ויתר מוסרותיו ויצו להביא את ראשי הכהנים ואת כל הסנהדרין ויורד את פולוס ויעמידהו בתוכם׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options