TRV
מתיו י׳:ט״ז-ל״ט
ט״ז
הנני שלח אתכם ככבשים בין הזאבים לכן היו ערומים כנחשים ותמימים כיונים׃
י״ז
והשמרו לכם מבני האדם כי ימסרו אתכם לסנהדריות ויכו אתכם בשוטים בבתי כנסיותיהם׃
י״ח
ולפני משלים ומלכים תובאו למעני לעדות להם ולגוים׃
י״ט
וכי ימסרו אתכם אל תדאגו איך ומה תדברו כי ינתן לכם בשעה ההיא את אשר תדברו׃
כ׳
כי לא אתם הם המדברים כי רוח אביכם הוא המדבר בפיכם׃
כ״א
והיה אח ימסר את אחיו למות ואב ימסר את בנו וקמו בנים באבותם וימיתו אותם׃
כ״ב
והייתם שנואים לכל אדם למען שמי והמחכה עד עת קץ הוא יושע׃
כ״ג
ואם ירדפו אתכם בעיר אחת נוסו לעיר אחרת כי אמן אמר אני לכם לא תכלו לעבר ערי ישראל עד כי יבוא בן האדם׃
כ״ד
אין תלמיד עלה על רבו ועבד על אדניו׃
כ״ה
דיו לתלמיד להיות כרבו ולעבד להיות כאדניו אם לבעל הבית קראו בעל זבוב אף לאנשי ביתו׃
כ״ו
על כן לא תיראום כי אין דבר מכסה אשר לא יגלה ואין נעלם אשר לא יודע׃
כ״ז
את אשר אני אמר לכם בחשך דברו באור ואשר ילחש לאזניכם השמיעו על הגגות׃
כ״ח
ואל תיראי מן ההרגים את הגוף ואת הנפש לא יוכלו להרג אך תיראו את אשר יוכל לאבד גם את הנפש גם את הגוף בגיהנם׃
כ״ט
הלא תמכרנה שתי צפרים באסר ואחת מהנה לא תפול ארצה מבלעדי אביכם׃
ל׳
ואתם גם שערות ראשכם נמנות כלן׃
ל״א
לכן אל תיראו הנכם יקרים מצפרים רבות׃
ל״ב
הן כל אשר יודה בי לפני האדם אודה בו גם אני לפני אבי שבשמים׃
ל״ג
ואשר יכחש בי לפני האדם אכחש בו גם אני לפני אבי שבשמים׃
ל״ד
אל תחשבו כי באתי להטיל שלום בארץ לא באתי להטיל שלום כי אם חרב׃
ל״ה
כי באתי להפריד איש מאביו ובת מאמה וכלה מחמותה׃
ל״ו
ואיבי איש אנשי ביתו׃
ל״ז
האהב את אביו ואת אמו יותר ממני איננו כדי לי והאהב את בנו ובתו יותר ממני איננו כדי לי׃
ל״ח
ואשר לא יקח את צלבו והלך אחרי איננו כדי לי׃
ל״ט
המצא את נפשו יאבדנה והמאבד את נפשו למעני הוא ימצאנה׃
Settings