פסוקים על Persecution: Daniel

13 פסוקים · 61 היבטים

פסוקים על Daniel

  1. דָּנִיֵּאל ו׳:ה׳

    אדין גבריא אלך אמרין די לא נהשכח לדניאל דנה כל עלא להן השכחנה עלוהי בדת אלהה׃

  2. דָּנִיֵּאל ו׳:ו׳

    אדין סרכיא ואחשדרפניא אלן הרגשו על מלכא וכן אמרין לה דריוש מלכא לעלמין חיי׃

  3. דָּנִיֵּאל ו׳:ז׳

    אתיעטו כל סרכי מלכותא סגניא ואחשדרפניא הדבריא ופחותא לקימה קים מלכא ולתקפה אסר די כל די יבעה בעו מן כל אלה ואנש עד יומין תלתין להן מנך מלכא יתרמא לגב אריותא׃

  4. דָּנִיֵּאל ו׳:ח׳

    כען מלכא תקים אסרא ותרשם כתבא די לא להשניה כדת מדי ופרס די לא תעדא׃

  5. דָּנִיֵּאל ו׳:ט׳

    כל קבל דנה מלכא דריוש רשם כתבא ואסרא׃

  6. דָּנִיֵּאל ו׳:י׳

    ודניאל כדי ידע די רשים כתבא על לביתה וכוין פתיחן לה בעליתה נגד ירושלם וזמנין תלתה ביומא הוא ברך על ברכוהי ומצלא ומודא קדם אלהה כל קבל די הוא עבד מן קדמת דנה׃

  7. דָּנִיֵּאל ו׳:י״א

    אדין גבריא אלך הרגשו והשכחו לדניאל בעא ומתחנן קדם אלהה׃

  8. דָּנִיֵּאל ו׳:י״ב

    באדין קריבו ואמרין קדם מלכא על אסר מלכא הלא אסר רשמת די כל אנש די יבעה מן כל אלה ואנש עד יומין תלתין להן מנך מלכא יתרמא לגוב אריותא ענה מלכא ואמר יציבא מלתא כדת מדי ופרס די לא תעדא׃

  9. דָּנִיֵּאל ו׳:י״ג

    באדין ענו ואמרין קדם מלכא די דניאל די מן בני גלותא די יהוד לא שם עליך מלכא טעם ועל אסרא די רשמת וזמנין תלתה ביומא בעא בעותה׃

  10. דָּנִיֵּאל ו׳:י״ד

    אדין מלכא כדי מלתא שמע שגיא באש עלוהי ועל דניאל שם בל לשיזבותה ועד מעלי שמשא הוא משתדר להצלותה׃

  11. דָּנִיֵּאל ו׳:ט״ו

    באדין גבריא אלך הרגשו על מלכא ואמרין למלכא דע מלכא די דת למדי ופרס די כל אסר וקים די מלכא יהקים לא להשניה׃

  12. דָּנִיֵּאל ו׳:ט״ז

    באדין מלכא אמר והיתיו לדניאל ורמו לגבא די אריותא ענה מלכא ואמר לדניאל אלהך די אנתה פלח לה בתדירא הוא ישיזבנך׃

  13. דָּנִיֵּאל ו׳:י״ז

    והיתית אבן חדה ושמת על פם גבא וחתמה מלכא בעזקתה ובעזקת רברבנוהי די לא תשנא צבו בדניאל׃