פסוקים על Hypocrisy: General references

כן ארחות כל שכחי אל ותקות חנף תאבד׃

אשר יקוט כסלו ובית עכביש מבטחו׃

ישען על ביתו ולא יעמד יחזיק בו ולא יקום׃

יחמס כגפן בסרו וישלך כזית נצתו׃

כי עדת חנף גלמוד ואש אכלה אהלי שחד׃

הזאת ידעת מני עד מני שים אדם עלי ארץ׃

כי רננת רשעים מקרוב ושמחת חנף עדי רגע׃

אם יעלה לשמים שיאו וראשו לעב יגיע׃

כגללו לנצח יאבד ראיו יאמרו איו׃

כחלום יעוף ולא ימצאוהו וידד כחזיון לילה׃

עין שזפתו ולא תוסיף ולא עוד תשורנו מקומו׃

בניו ירצו דלים וידיו תשבנה אונו׃

עצמותיו מלאו עלומו ועמו על עפר תשכב׃

אם תמתיק בפיו רעה יכחידנה תחת לשונו׃

יחמל עליה ולא יעזבנה וימנענה בתוך חכו׃

לחמו במעיו נהפך מרורת פתנים בקרבו׃

חיל בלע ויקאנו מבטנו יורשנו אל׃

ראש פתנים יינק תהרגהו לשון אפעה׃

אל ירא בפלגות נהרי נחלי דבש וחמאה׃

משיב יגע ולא יבלע כחיל תמורתו ולא יעלס׃

כי מה תקות חנף כי יבצע כי ישל אלוה נפשו׃

הצעקתו ישמע אל כי תבוא עליו צרה׃

אם על שדי יתענג יקרא אלוה בכל עת׃

זה חלק אדם רשע עם אל ונחלת עריצים משדי יקחו׃

אם ירבו בניו למו חרב וצאצאיו לא ישבעו לחם׃