פסוקים על Delilah

15 פסוקים · 1 היבט

פסוקי מפתח

  1. שֹׁפְטִים ט״ז:ד׳

    ויהי אחרי כן ויאהב אשה בנחל שרק ושמה דלילה׃

  2. שֹׁפְטִים ט״ז:ה׳

    ויעלו אליה סרני פלשתים ויאמרו לה פתי אותו וראי במה כחו גדול ובמה נוכל לו ואסרנהו לענתו ואנחנו נתן לך איש אלף ומאה כסף׃

  3. שֹׁפְטִים ט״ז:ו׳

    ותאמר דלילה אל שמשון הגידה נא לי במה כחך גדול ובמה תאסר לענותך׃

  4. שֹׁפְטִים ט״ז:ז׳

    ויאמר אליה שמשון אם יאסרני בשבעה יתרים לחים אשר לא חרבו וחליתי והייתי כאחד האדם׃

  5. שֹׁפְטִים ט״ז:ח׳

    ויעלו לה סרני פלשתים שבעה יתרים לחים אשר לא חרבו ותאסרהו בהם׃

  6. שֹׁפְטִים ט״ז:ט׳

    והארב ישב לה בחדר ותאמר אליו פלשתים עליך שמשון וינתק את היתרים כאשר ינתק פתיל הנערת בהריחו אש ולא נודע כחו׃

  7. שֹׁפְטִים ט״ז:י׳

    ותאמר דלילה אל שמשון הנה התלת בי ותדבר אלי כזבים עתה הגידה נא לי במה תאסר׃

  8. שֹׁפְטִים ט״ז:י״א

    ויאמר אליה אם אסור יאסרוני בעבתים חדשים אשר לא נעשה בהם מלאכה וחליתי והייתי כאחד האדם׃

  9. שֹׁפְטִים ט״ז:י״ב

    ותקח דלילה עבתים חדשים ותאסרהו בהם ותאמר אליו פלשתים עליך שמשון והארב ישב בחדר וינתקם מעל זרעתיו כחוט׃

  10. שֹׁפְטִים ט״ז:י״ג

    ותאמר דלילה אל שמשון עד הנה התלת בי ותדבר אלי כזבים הגידה לי במה תאסר ויאמר אליה אם תארגי את שבע מחלפות ראשי עם המסכת׃

  11. שֹׁפְטִים ט״ז:י״ד

    ותתקע ביתד ותאמר אליו פלשתים עליך שמשון וייקץ משנתו ויסע את היתד הארג ואת המסכת׃

  12. שֹׁפְטִים ט״ז:ט״ו

    ותאמר אליו איך תאמר אהבתיך ולבך אין אתי זה שלש פעמים התלת בי ולא הגדת לי במה כחך גדול׃

  13. שֹׁפְטִים ט״ז:ט״ז

    ויהי כי הציקה לו בדבריה כל הימים ותאלצהו ותקצר נפשו למות׃

  14. שֹׁפְטִים ט״ז:י״ז

    ויגד לה את כל לבו ויאמר לה מורה לא עלה על ראשי כי נזיר אלהים אני מבטן אמי אם גלחתי וסר ממני כחי וחליתי והייתי ככל האדם׃

  15. שֹׁפְטִים ט״ז:י״ח

    ותרא דלילה כי הגיד לה את כל לבו ותשלח ותקרא לסרני פלשתים לאמר עלו הפעם כי הגיד לה את כל לבו ועלו אליה סרני פלשתים ויעלו הכסף בידם׃