God

דרך אמונה בחרתי משפטיך שויתי׃

דבקתי בעדותיך יהוה אל תבישני׃

דרך מצותיך ארוץ כי תרחיב לבי׃

הורני יהוה דרך חקיך ואצרנה עקב׃

הבינני ואצרה תורתך ואשמרנה בכל לב׃

הדריכני בנתיב מצותיך כי בו חפצתי׃

הט לבי אל עדותיך ואל אל בצע׃

העבר עיני מראות שוא בדרכך חיני׃

הקם לעבדך אמרתך אשר ליראתך׃

העבר חרפתי אשר יגרתי כי משפטיך טובים׃

הנה תאבתי לפקדיך בצדקתך חיני׃

ויבאני חסדך יהוה תשועתך כאמרתך׃

ואענה חרפי דבר כי בטחתי בדברך׃

ואל תצל מפי דבר אמת עד מאד כי למשפטך יחלתי׃

ואשמרה תורתך תמיד לעולם ועד׃

ואתהלכה ברחבה כי פקדיך דרשתי׃

ואדברה בעדתיך נגד מלכים ולא אבוש׃

ואשתעשע במצותיך אשר אהבתי׃

ואשא כפי אל מצותיך אשר אהבתי ואשיחה בחקיך׃

זכר דבר לעבדך על אשר יחלתני׃

זאת נחמתי בעניי כי אמרתך חיתני׃

זדים הליצני עד מאד מתורתך לא נטיתי׃

זכרתי משפטיך מעולם יהוה ואתנחם׃

זלעפה אחזתני מרשעים עזבי תורתך׃

זכרתי בלילה שמך יהוה ואשמרה תורתך׃