God

יהוה ידין עמים שפטני יהוה כצדקי וכתמי עלי׃

יגמר נא רע רשעים ותכונן צדיק ובחן לבות וכליות אלהים צדיק׃

מגני על אלהים מושיע ישרי לב׃

אלהים שופט צדיק ואל זעם בכל יום׃

אם לא ישוב חרבו ילטוש קשתו דרך ויכוננה׃

ולו הכין כלי מות חציו לדלקים יפעל׃

אודה יהוה כצדקו ואזמרה שם יהוה עליון׃

¶ למנצח על הגתית מזמור לדוד יהוה אדנינו מה אדיר שמך בכל הארץ אשר תנה הודך על השמים׃

מפי עוללים וינקים יסדת עז למען צורריך להשבית אויב ומתנקם׃

כי אראה שמיך מעשי אצבעתיך ירח וכוכבים אשר כוננתה׃

מה אנוש כי תזכרנו ובן אדם כי תפקדנו׃

ותחסרהו מעט מאלהים וכבוד והדר תעטרהו׃

תמשילהו במעשי ידיך כל שתה תחת רגליו׃

יהוה אדנינו מה אדיר שמך בכל הארץ׃

¶ למנצח עלמות לבן מזמור לדוד אודה יהוה בכל לבי אספרה כל נפלאותיך׃

אשמחה ואעלצה בך אזמרה שמך עליון׃

בשוב אויבי אחור יכשלו ויאבדו מפניך׃

כי עשית משפטי ודיני ישבת לכסא שופט צדק׃

גערת גוים אבדת רשע שמם מחית לעולם ועד׃

ויהוה לעולם ישב כונן למשפט כסאו׃

והוא ישפט תבל בצדק ידין לאמים במישרים׃

ויהי יהוה משגב לדך משגב לעתות בצרה׃

ויבטחו בך יודעי שמך כי לא עזבת דרשיך יהוה׃

זמרו ליהוה ישב ציון הגידו בעמים עלילותיו׃

כי דרש דמים אותם זכר לא שכח צעקת עניים׃