מִיכָהז׳

קינת הנביא על השחיתות

א׳
אללי לי כי הייתי כאספי קיץ כעללת בציר אין אשכול לאכול בכורה אותה נפשי׃
ב׳
אבד חסיד מן הארץ וישר באדם אין כלם לדמים יארבו איש את אחיהו יצודו חרם׃
ג׳
על הרע כפים להיטיב השר שאל והשפט בשלום והגדול דבר הות נפשו הוא ויעבתוה׃
ד׳
טובם כחדק ישר ממסוכה יום מצפיך פקדתך באה עתה תהיה מבוכתם׃
ה׳
אל תאמינו ברע אל תבטחו באלוף משכבת חיקך שמר פתחי פיך׃
ו׳
כי בן מנבל אב בת קמה באמה כלה בחמתה איבי איש אנשי ביתו׃

החלטה של אמונה ותקווה

ז׳
ואני ביהוה אצפה אוחילה לאלהי ישעי ישמעני אלהי׃
ח׳
אל תשמחי איבתי לי כי נפלתי קמתי כי אשב בחשך יהוה אור לי׃
ט׳
זעף יהוה אשא כי חטאתי לו עד אשר יריב ריבי ועשה משפטי יוציאני לאור אראה בצדקתו׃
י׳
ותרא איבתי ותכסה בושה האמרה אלי איו יהוה אלהיך עיני תראינה בה עתה תהיה למרמס כטיט חוצות׃

הבטחת שיקום ושיבה

י״א
יום לבנות גדריך יום ההוא ירחק חק׃
י״ב
יום הוא ועדיך יבוא למני אשור וערי מצור ולמני מצור ועד נהר וים מים והר ההר׃
י״ג
והיתה הארץ לשממה על ישביה מפרי מעלליהם׃

תפילה להשגחת הרועה

י״ד
רעה עמך בשבטך צאן נחלתך שכני לבדד יער בתוך כרמל ירעו בשן וגלעד כימי עולם׃
ט״ו
כימי צאתך מארץ מצרים אראנו נפלאות׃
ט״ז
יראו גוים ויבשו מכל גבורתם ישימו יד על פה אזניהם תחרשנה׃
י״ז
ילחכו עפר כנחש כזחלי ארץ ירגזו ממסגרתיהם אל יהוה אלהינו יפחדו ויראו ממך׃

דוקסולוגיה: חסד אלוהים שאין דומה לו

י״ח
מי אל כמוך נשא עון ועבר על פשע לשארית נחלתו לא החזיק לעד אפו כי חפץ חסד הוא׃
י״ט
ישוב ירחמנו יכבש עונתינו ותשליך במצלות ים כל חטאותם׃
כ׳
תתן אמת ליעקב חסד לאברהם אשר נשבעת לאבתינו מימי קדם׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options