דָּנִיֵּאלח׳

החזון בשושן

א׳
בשנת שלוש למלכות בלאשצר המלך חזון נראה אלי אני דניאל אחרי הנראה אלי בתחלה׃
ב׳
ואראה בחזון ויהי בראתי ואני בשושן הבירה אשר בעילם המדינה ואראה בחזון ואני הייתי על אובל אולי׃

האיל והעז

ג׳
ואשא עיני ואראה והנה איל אחד עמד לפני האבל ולו קרנים והקרנים גבהות והאחת גבהה מן השנית והגבהה עלה באחרנה׃
ד׳
ראיתי את האיל מנגח ימה וצפונה ונגבה וכל חיות לא יעמדו לפניו ואין מציל מידו ועשה כרצנו והגדיל׃
ה׳
ואני הייתי מבין והנה צפיר העזים בא מן המערב על פני כל הארץ ואין נוגע בארץ והצפיר קרן חזות בין עיניו׃
ו׳
ויבא עד האיל בעל הקרנים אשר ראיתי עמד לפני האבל וירץ אליו בחמת כחו׃
ז׳
וראיתיו מגיע אצל האיל ויתמרמר אליו ויך את האיל וישבר את שתי קרניו ולא היה כח באיל לעמד לפניו וישליכהו ארצה וירמסהו ולא היה מציל לאיל מידו׃
ח׳
וצפיר העזים הגדיל עד מאד וכעצמו נשברה הקרן הגדולה ותעלנה חזות ארבע תחתיה לארבע רוחות השמים׃

עליית הקרן הקטנה

ט׳
ומן האחת מהם יצא קרן אחת מצעירה ותגדל יתר אל הנגב ואל המזרח ואל הצבי׃
י׳
ותגדל עד צבא השמים ותפל ארצה מן הצבא ומן הכוכבים ותרמסם׃
י״א
ועד שר הצבא הגדיל וממנו הרים התמיד והשלך מכון מקדשו׃
י״ב
וצבא תנתן על התמיד בפשע ותשלך אמת ארצה ועשתה והצליחה׃
י״ג
ואשמעה אחד קדוש מדבר ויאמר אחד קדוש לפלמוני המדבר עד מתי החזון התמיד והפשע שמם תת וקדש וצבא מרמס׃
י״ד
ויאמר אלי עד ערב בקר אלפים ושלש מאות ונצדק קדש׃

גבריאל מפרש את החזון

ט״ו
ויהי בראתי אני דניאל את החזון ואבקשה בינה והנה עמד לנגדי כמראה גבר׃
ט״ז
ואשמע קול אדם בין אולי ויקרא ויאמר גבריאל הבן להלז את המראה׃
י״ז
ויבא אצל עמדי ובבאו נבעתי ואפלה על פני ויאמר אלי הבן בן אדם כי לעת קץ החזון׃
י״ח
ובדברו עמי נרדמתי על פני ארצה ויגע בי ויעמידני על עמדי׃
י״ט
ויאמר הנני מודיעך את אשר יהיה באחרית הזעם כי למועד קץ׃

פירוש: מדי ופרס, יוון והקרן הקטנה

כ׳
האיל אשר ראית בעל הקרנים מלכי מדי ופרס׃
כ״א
והצפיר השעיר מלך יון והקרן הגדולה אשר בין עיניו הוא המלך הראשון׃
כ״ב
והנשברת ותעמדנה ארבע תחתיה ארבע מלכיות מגוי יעמדנה ולא בכחו׃
כ״ג
ובאחרית מלכותם כהתם הפשעים יעמד מלך עז פנים ומבין חידות׃
כ״ד
ועצם כחו ולא בכחו ונפלאות ישחית והצליח ועשה והשחית עצומים ועם קדשים׃
כ״ה
ועל שכלו והצליח מרמה בידו ובלבבו יגדיל ובשלוה ישחית רבים ועל שר שרים יעמד ובאפס יד ישבר׃
כ״ו
ומראה הערב והבקר אשר נאמר אמת הוא ואתה סתם החזון כי לימים רבים׃

תגובת דניאל וסיום

כ״ז
ואני דניאל נהייתי ונחליתי ימים ואקום ואעשה את מלאכת המלך ואשתומם על המראה ואין מבין׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options