עָמוֹסב׳

משפט על מואב

א׳
כה אמר יהוה על שלשה פשעי מואב ועל ארבעה לא אשיבנו על שרפו עצמות מלך אדום לשיד׃
ב׳
ושלחתי אש במואב ואכלה ארמנות הקריות ומת בשאון מואב בתרועה בקול שופר׃
ג׳
והכרתי שופט מקרבה וכל שריה אהרוג עמו אמר יהוה׃

משפט על יהודה

ד׳
כה אמר יהוה על שלשה פשעי יהודה ועל ארבעה לא אשיבנו על מאסם את תורת יהוה וחקיו לא שמרו ויתעום כזביהם אשר הלכו אבותם אחריהם׃
ה׳
ושלחתי אש ביהודה ואכלה ארמנות ירושלם׃

משפט על ישראל בעבור עוול חברתי

ו׳
כה אמר יהוה על שלשה פשעי ישראל ועל ארבעה לא אשיבנו על מכרם בכסף צדיק ואביון בעבור נעלים׃
ז׳
השאפים על עפר ארץ בראש דלים ודרך ענוים יטו ואיש ואביו ילכו אל הנערה למען חלל את שם קדשי׃
ח׳
ועל בגדים חבלים יטו אצל כל מזבח ויין ענושים ישתו בית אלהיהם׃

חסד אלוהים בעבר ומרד ישראל

ט׳
ואנכי השמדתי את האמרי מפניהם אשר כגבה ארזים גבהו וחסן הוא כאלונים ואשמיד פריו ממעל ושרשיו מתחת׃
י׳
ואנכי העליתי אתכם מארץ מצרים ואולך אתכם במדבר ארבעים שנה לרשת את ארץ האמרי׃
י״א
ואקים מבניכם לנביאים ומבחוריכם לנזרים האף אין זאת בני ישראל נאם יהוה׃
י״ב
ותשקו את הנזרים יין ועל הנביאים צויתם לאמר לא תנבאו׃

העונש הבלתי נמנע מוכרז

י״ג
הנה אנכי מעיק תחתיכם כאשר תעיק העגלה המלאה לה עמיר׃
י״ד
ואבד מנוס מקל וחזק לא יאמץ כחו וגבור לא ימלט נפשו׃
ט״ו
ותפש הקשת לא יעמד וקל ברגליו לא ימלט ורכב הסוס לא ימלט נפשו׃
ט״ז
ואמיץ לבו בגבורים ערום ינוס ביום ההוא נאם יהוה׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options