TRV
מַעֲשֵׂי הַשְּׁלִיחִים ט׳:ל״ב-מ״ג
ל״ב
ויהי בסבב פטרוס בכל המקמות וירד גם אל הקדושים אשר ישבו בלד׃
ל״ג
וימצא שם איש שמו אניס והוא שכב על משכבו זה שמנה שנים והוא נכה אברים׃
ל״ד
ויאמר אליו פטרוס אניס רפאך ישוע המשיח קום הצע לך אתה ויקם פתאם׃
ל״ה
ויראו אותו כל ישבי לד והשרון ויפנו אל האדון׃
ל״ו
ותלמידה ביפו ושמה טביתא תרגומו צביה והיא מלאה מעשים טובים וצדקות אשר עשתה׃
ל״ז
ויהי בימים ההם ותחלה ותמת וירחצו אתה וישימוה בעליה׃
ל״ח
ולד קרובה היא ליפו וישמעו התלמידים כי פטרוס שם וישלחו אליו שני אנשים ויפצרו בו לבלתי העצל לעבר אליהם׃
ל״ט
ויקם פטרוס וילך אתם ובבאו העלהו אל העליה ותנשנה אליו כל האלמנות בוכיות ומראות לו את הכתנת ואת הבגדים אשר עשתה צביה בעודה עמהן׃
מ׳
ויוצא פטרוס את כלם החוצה ויכרע על ברכיו ויתפלל ויפן אל גויתה ויאמר טביתא קומי ותפתח את עיניה ותרא את פטרוס ותתעודד׃
מ״א
וישלח ידו ויקם אתה ויקרא את הקדושים ואת האלמנות ויעמד אתה חיה לפניהם׃
מ״ב
ויודע הדבר בכל יפו ויאמינו רבים באדון׃
מ״ג
ויואל לשבת ביפו ימים רבים עם בורסי אחד ושמו שמעון׃
Settings