פסוקים על Reuben: Adroitly seeks to save Joseph from the conspiracy of his brethren

וישמע ראובן ויצלהו מידם ויאמר לא נכנו נפש׃

ויאמר אלהם ראובן אל תשפכו דם השליכו אתו אל הבור הזה אשר במדבר ויד אל תשלחו בו למען הציל אתו מידם להשיבו אל אביו׃

ויהי כאשר בא יוסף אל אחיו ויפשיטו את יוסף את כתנתו את כתנת הפסים אשר עליו׃

ויקחהו וישלכו אתו הברה והבור רק אין בו מים׃

וישבו לאכל לחם וישאו עיניהם ויראו והנה ארחת ישמעאלים באה מגלעד וגמליהם נשאים נכאת וצרי ולט הולכים להוריד מצרימה׃

ויאמר יהודה אל אחיו מה בצע כי נהרג את אחינו וכסינו את דמו׃

לכו ונמכרנו לישמעאלים וידנו אל תהי בו כי אחינו בשרנו הוא וישמעו אחיו׃

ויעברו אנשים מדינים סחרים וימשכו ויעלו את יוסף מן הבור וימכרו את יוסף לישמעאלים בעשרים כסף ויביאו את יוסף מצרימה׃

וישב ראובן אל הבור והנה אין יוסף בבור ויקרע את בגדיו׃

וישב אל אחיו ויאמר הילד איננו ואני אנה אני בא׃

ויען ראובן אתם לאמר הלוא אמרתי אליכם לאמר אל תחטאו בילד ולא שמעתם וגם דמו הנה נדרש׃