פסוקים על Olive Tree

ותבא אליו היונה לעת ערב והנה עלה זית טרף בפיה וידע נח כי קלו המים מעל הארץ׃

והשביעת תשמטנה ונטשתה ואכלו אביני עמך ויתרם תאכל חית השדה כן תעשה לכרמך לזיתך׃

ובתים מלאים כל טוב אשר לא מלאת וברת חצובים אשר לא חצבת כרמים וזיתים אשר לא נטעת ואכלת ושבעת׃

ארץ חטה ושערה וגפן ותאנה ורמון ארץ זית שמן ודבש׃

כי תחבט זיתך לא תפאר אחריך לגר ליתום ולאלמנה יהיה׃

זיתים יהיו לך בכל גבולך ושמן לא תסוך כי ישל זיתך׃

הלוך הלכו העצים למשח עליהם מלך ויאמרו לזית מלוכה עלינו׃

ויעש בדביר שני כרובים עצי שמן עשר אמות קומתו׃

ואת פתח הדביר עשה דלתות עצי שמן האיל מזוזות חמשית׃

ושתי דלתות עצי שמן וקלע עליהם מקלעות כרובים ותמרות ופטורי צצים וצפה זהב וירד על הכרובים ועל התמרות את הזהב׃

וכן עשה לפתח ההיכל מזוזות עצי שמן מאת רבעית׃

ואשר ישמיעו ויעבירו קול בכל עריהם ובירושלם לאמר צאו ההר והביאו עלי זית ועלי עץ שמן ועלי הדס ועלי תמרים ועלי עץ עבת לעשת סכת ככתוב׃

יחמס כגפן בסרו וישלך כזית נצתו׃

ונשאר בו עוללת כנקף זית שנים שלשה גרגרים בראש אמיר ארבעה חמשה בסעפיה פריה נאם יהוה אלהי ישראל׃

ויאמר אלי מה אתה ראה ויאמר ראיתי והנה מנורת זהב כלה וגלה על ראשה ושבעה נרתיה עליה שבעה ושבעה מוצקות לנרות אשר על ראשה׃

ושנים זיתים עליה אחד מימין הגלה ואחד על שמאלה׃

ואען ואמר אל המלאך הדבר בי לאמר מה אלה אדני׃

ויען המלאך הדבר בי ויאמר אלי הלוא ידעת מה המה אלה ואמר לא אדני׃

ויען ויאמר אלי לאמר זה דבר יהוה אל זרבבל לאמר לא בחיל ולא בכח כי אם ברוחי אמר יהוה צבאות׃

מי אתה הר הגדול לפני זרבבל למישר והוציא את האבן הראשה תשאות חן חן לה׃

ויהי דבר יהוה אלי לאמר׃

ידי זרבבל יסדו הבית הזה וידיו תבצענה וידעת כי יהוה צבאות שלחני אלכם׃

כי מי בז ליום קטנות ושמחו וראו את האבן הבדיל ביד זרבבל שבעה אלה עיני יהוה המה משוטטים בכל הארץ׃

ואען ואמר אליו מה שני הזיתים האלה על ימין המנורה ועל שמאולה׃

ואען שנית ואמר אליו מה שתי שבלי הזיתים אשר ביד שני צנתרות הזהב המריקים מעליהם הזהב׃