פסוקים על Church (2)

נהר פלגיו ישמחו עיר אלהים קדש משכני עליון׃

אלהים בקרבה בל תמוט יעזרה אלהים לפנות בקר׃

¶ שיר מזמור לבני קרח גדול יהוה ומהלל מאד בעיר אלהינו הר קדשו׃

יפה נוף משוש כל הארץ הר ציון ירכתי צפון קרית מלך רב׃

ישמח הר ציון תגלנה בנות יהודה למען משפטיך׃

סבו ציון והקיפוה ספרו מגדליה׃

שיתו לבכם לחילה פסגו ארמנותיה למען תספרו לדור אחרון׃

כי אלהים יושיע ציון ויבנה ערי יהודה וישבו שם וירשוה׃

וזרע עבדיו ינחלוה ואהבי שמו ישכנו בה׃

¶ למנצח על הגתית לבני קרח מזמור מה ידידות משכנותיך יהוה צבאות׃

נכספה וגם כלתה נפשי לחצרות יהוה לבי ובשרי ירננו אל אל חי׃

גם צפור מצאה בית ודרור קן לה אשר שתה אפרחיה את מזבחותיך יהוה צבאות מלכי ואלהי׃

אשרי יושבי ביתך עוד יהללוך סלה׃

אשרי אדם עוז לו בך מסלות בלבבם׃

עברי בעמק הבכא מעין ישיתוהו גם ברכות יעטה מורה׃

ילכו מחיל אל חיל יראה אל אלהים בציון׃

יהוה אלהים צבאות שמעה תפלתי האזינה אלהי יעקב סלה׃

מגננו ראה אלהים והבט פני משיחך׃

כי טוב יום בחצריך מאלף בחרתי הסתופף בבית אלהי מדור באהלי רשע׃

¶ לבני קרח מזמור שיר יסודתו בהררי קדש׃

אהב יהוה שערי ציון מכל משכנות יעקב׃

נכבדות מדבר בך עיר האלהים סלה׃

אזכיר רהב ובבל לידעי הנה פלשת וצור עם כוש זה ילד שם׃

ולציון יאמר איש ואיש ילד בה והוא יכוננה עליון׃

יהוה יספר בכתוב עמים זה ילד שם סלה׃