פסוקים על Abijah

18 פסוקים · 1 היבט

פסוקי מפתח

1 מְלָכִים י״ד:א׳
¶ בעת ההיא חלה אביה בן ירבעם׃
1 מְלָכִים י״ד:ב׳
ויאמר ירבעם לאשתו קומי נא והשתנית ולא ידעו כי אתי אשת ירבעם והלכת שלה הנה שם אחיה הנביא הוא דבר עלי למלך על העם הזה׃
1 מְלָכִים י״ד:ג׳
ולקחת בידך עשרה לחם ונקדים ובקבק דבש ובאת אליו הוא יגיד לך מה יהיה לנער׃
1 מְלָכִים י״ד:ד׳
ותעש כן אשת ירבעם ותקם ותלך שלה ותבא בית אחיה ואחיהו לא יכל לראות כי קמו עיניו משיבו׃
1 מְלָכִים י״ד:ה׳
ויהוה אמר אל אחיהו הנה אשת ירבעם באה לדרש דבר מעמך אל בנה כי חלה הוא כזה וכזה תדבר אליה ויהי כבאה והיא מתנכרה׃
1 מְלָכִים י״ד:ו׳
ויהי כשמע אחיהו את קול רגליה באה בפתח ויאמר באי אשת ירבעם למה זה את מתנכרה ואנכי שלוח אליך קשה׃
1 מְלָכִים י״ד:ז׳
לכי אמרי לירבעם כה אמר יהוה אלהי ישראל יען אשר הרימתיך מתוך העם ואתנך נגיד על עמי ישראל׃
1 מְלָכִים י״ד:ח׳
ואקרע את הממלכה מבית דוד ואתנה לך ולא היית כעבדי דוד אשר שמר מצותי ואשר הלך אחרי בכל לבבו לעשות רק הישר בעיני׃
1 מְלָכִים י״ד:ט׳
ותרע לעשות מכל אשר היו לפניך ותלך ותעשה לך אלהים אחרים ומסכות להכעיסני ואתי השלכת אחרי גוך׃
1 מְלָכִים י״ד:י׳
לכן הנני מביא רעה אל בית ירבעם והכרתי לירבעם משתין בקיר עצור ועזוב בישראל ובערתי אחרי בית ירבעם כאשר יבער הגלל עד תמו׃
1 מְלָכִים י״ד:י״א
המת לירבעם בעיר יאכלו הכלבים והמת בשדה יאכלו עוף השמים כי יהוה דבר׃
1 מְלָכִים י״ד:י״ב
ואת קומי לכי לביתך בבאה רגליך העירה ומת הילד׃
1 מְלָכִים י״ד:י״ג
וספדו לו כל ישראל וקברו אתו כי זה לבדו יבא לירבעם אל קבר יען נמצא בו דבר טוב אל יהוה אלהי ישראל בבית ירבעם׃
1 מְלָכִים י״ד:י״ד
והקים יהוה לו מלך על ישראל אשר יכרית את בית ירבעם זה היום ומה גם עתה׃
1 מְלָכִים י״ד:ט״ו
והכה יהוה את ישראל כאשר ינוד הקנה במים ונתש את ישראל מעל האדמה הטובה הזאת אשר נתן לאבותיהם וזרם מעבר לנהר יען אשר עשו את אשריהם מכעיסים את יהוה׃
1 מְלָכִים י״ד:ט״ז
ויתן את ישראל בגלל חטאות ירבעם אשר חטא ואשר החטיא את ישראל׃
1 מְלָכִים י״ד:י״ז
ותקם אשת ירבעם ותלך ותבא תרצתה היא באה בסף הבית והנער מת׃
1 מְלָכִים י״ד:י״ח
ויקברו אתו ויספדו לו כל ישראל כדבר יהוה אשר דבר ביד עבדו אחיהו הנביא׃