תְהִלִּיםנ״ט

זעקה להצלה מאויבים בוגדניים

א׳
למנצח אל תשחת לדוד מכתם בשלח שאול וישמרו את הבית להמיתו הצילני מאיבי אלהי ממתקוממי תשגבני׃
ב׳
הצילני מפעלי און ומאנשי דמים הושיעני׃
ג׳
כי הנה ארבו לנפשי יגורו עלי עזים לא פשעי ולא חטאתי יהוה׃
ד׳
בלי עון ירוצון ויכוננו עורה לקראתי וראה׃
ה׳
ואתה יהוה אלהים צבאות אלהי ישראל הקיצה לפקד כל הגוים אל תחן כל בגדי און סלה׃

התנהגותם האלימה של הרשעים

ו׳
ישובו לערב יהמו ככלב ויסובבו עיר׃
ז׳
הנה יביעון בפיהם חרבות בשפתותיהם כי מי שמע׃
ח׳
ואתה יהוה תשחק למו תלעג לכל גוים׃
ט׳
עזו אליך אשמרה כי אלהים משגבי׃
י׳
אלהי חסדו יקדמני אלהים יראני בשררי׃

תפילה למשפט ולכבוד האלוהים

י״א
אל תהרגם פן ישכחו עמי הניעמו בחילך והורידמו מגננו אדני׃
י״ב
חטאת פימו דבר שפתימו וילכדו בגאונם ומאלה ומכחש יספרו׃
י״ג
כלה בחמה כלה ואינמו וידעו כי אלהים משל ביעקב לאפסי הארץ סלה׃

התוצאה הסופית: בושת הרשעים ותהילת האלוהים

י״ד
וישובו לערב יהמו ככלב ויסובבו עיר׃
ט״ו
המה ינועון לאכל אם לא ישבעו וילינו׃
ט״ז
ואני אשיר עזך וארנן לבקר חסדך כי היית משגב לי ומנוס ביום צר לי׃
י״ז
עזי אליך אזמרה כי אלהים משגבי אלהי חסדי׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options